“გეკითხებით, როგორ უნდა იმყოფინოს პროფესიონალმა სამხედრომ აღნიშნული ხელფასი ნორმალურ პირობებში ცხოვრებისთვის?” – ლაშა დიაროვი

172
სააგენტო "პარალელი"

“სტრატეგია აღმაშენებლის” პოლიტიკური საბჭოს წევრი, ლაშა დიაროვი სოციალურ ქსელში გამოქვეყნებული პოსტით ქართველი ჯარისკაცების მიმართ ხელისუფლების დამოკიდებულებაზე საუბრობს და ყურადღებას ამახვილებს ფინანსურ მხარდაჭერაზე, ხელფასების დინამიკაზე 2012 წლიდან დღემდე:

მეგობრებო, ძალიან მნიშვნელოვანი ინფორმაცია მინდა მოგაწოდოთ ჩვენი გმირი ჯარისკაცების შესახებ:

2012 წელს ჯარისკაცის ხელფასი დაახლოებით იყო 750 ლარი ხელზე, ხოლო 2022 წელს – 935 ლარი ხელზე. ასევე, 2012 წელს სამხედრო სამსახურის უმცროსი ოფიცრების ხელფასი დაახლოებით იყო 1100 ლარი ხელზე, ხოლო 2022 წელს – 1320 ლარი ხელზე.

რამდენიმე დღის წინ, ირაკლი ღარიბაშვილმა დაასპონსორა საკუთარი პოსტი, სადაც სიამაყით აცხადებდა, რომ თურმე ჯარისკაცის ხელფასი 20 პროცენტით გაიზრდება. ხელფასის მომატება კარგია, თუმცა ერთ დეტალს მინდა მივაპყრო თქვენი ყურადღება.

2012 წელს საქართველოს ბიუჯეტი იყო დაახლოებით 8 მილიარდი ლარი, 2022 წელს კი, ქვეყანაში არსებული კატასტროფული ინფლაციის გამო, დაახლოებით 20 მილიარდი ლარი გახდა. ამასთან, 2012 წელს პური თუ ღირდა 60-70 თეთრი, ახლა ღირს 1.5 ლარი. 2012 წელს ბენზინი თუ ღირდა 1.8 ლარი, ახლა ღირს 3.5 ლარი. ადამიანის არსებობისთვის აუცილებელი პროდუქტებისა და წამლების ფასები გასამმაგებულია. შესაბამისად, 2012 წელთან შედარებით ახლა ადამიანს საარსებოდ სამჯერ მეტი თანხა ესაჭიროება.

ამ დროს კი, როგორც ვხედავთ ჯარისკაცისა და სამხედრო ოფიცრების ხელფასები მიზერულად არის გაზრდილი.

მე მაქვს ერთ მარტივი შეკითხვა, ბიუჯეტის სამჯერ ზრდის პირობებში, რატომ არ გაიზარდა სამხედრო პირების ხელფასები შესაბამისად სამჯერ? რატომ არ გაიზარდა ზოგადად ხელფასები, პენსიები და სოციალური დახმარებები სამჯერ?

პასუხი მარტივია, ბიუჯეტიდან თანხები მიდის ისეთ პროექტებში, საიდანაც ფულის „მოტეხვა“ მარტივია, ანუ რეალურად ბიუჯეტის ფული მიდის კორუფციაში. ხელფასები კი ფასებთან მიმართებაში არაადეკვატურად მცირე რჩება.

გეკითხებით, როგორ უნდა იმყოფინოს პროფესიონალმა სამხედრომ ზემოთ აღნიშნული ხელფასი ნორმალურ პირობებში ცხოვრებისთვის?

აქვე მსურს გაგიზიაროთ ინფორმაცია, იმის შესახებ, თუ როგორ აფასებენ აღმოსავლეთ ევროპის ქვეყნები თავიანთ სამხედროებს. ჯარისკაცის ხელფასი ლატვიაში მერყეობს 855 – 1359 ევროს ფარგლებში, რანგისა და სტაჟის მიხედვით. პოლონეთში კი – 891-2095 ევროს ფარგლებში.

სამხედრო ოფიცრის ხელფასი ლიეტუვაში 1298 – 4,325 ევროს ფარგლებში მერყეობს, ხოლო ესტონეთში კი – 1783 – 5040 ევროს ფარგლებში, წოდებისა და სტაჟის მიხედვით.

ამ ყველაფრის ფონზე კი ქართული ოცნების მილიონერი ჩინოვნიკები ბედავენ და უკრაინაში მებრძოლ გმირებს ადანაშაულებენ იქ ფინანსური ინტერესის გამო წასვლაში, რაც აბსურდი და ტყუილია. არ გაბედოს არცერთმა კოლაბორაციონისტმა ქოცმა ჩვენი გმირების ხსენება! არ აქვთ მათ მორალური უფლება ისაუბრონ იმ ბიჭების შესახებ, რომლებიც ფრონტის ხაზზე საქართველოს ინტერესებს იცავენ.

კიდევ ერთხელ ვუდასტურებ ჩემ დიდ პატივისცემას ქართველ სამხედროებს.

დიდება საქართველოს! დიდება უკრაინას!” – წერს ფეისბუქის პირად გვერდზე ლასა დიაროვი.

კომენტარები პუბლიკაციაზე