მოძრაობა “ხალხის ძალის” მიერ მიხეილ სააკაშვილის ლიკვიდაციის დაგეგმვასთან დაკავშირებით გავრცელებულ სკანდალურ განცხადებას, ეხმაურება მე-3 პრეზიდენტის ადვოკატი. ვალერი გელბახიანმა საქალაქო სასამართლოში დღეს მიმდინარე პროცესზე მოსამართლეს კონკრეტული განცხადებით მიმართა:
“ერთი განცხადება მინდა გავაკეთო და სასამართლოს მივმართო ბატონ მიხეილ სააკაშვილის ადვოკატების სახელით.
გუშინ ერთ-ერთი საპარლამენტო ფრაქციის საგანგაშო განცხადება გავრცელდა, სადაც ჩვენ ამოვიკითხეთ, რომ მმართელი პარტიის შემადგენელი ნაწილი, ასე ვთქვათ, ე.წ. “ხალხი ძალა” აანონსებს სააკაშვილის მოკვლის ფაქტს.
ჩვენ მივმართავთ სასამართლოს – მიღებული იქნას დაუყოვნებლივი ზომები, ვინაიდან, თუ სახელმწიფოს პოლიტიკური ფრაქციის ხელმძღვანელობას გააჩნიათ ასეთი საგანგაშო და მართლაც გაუგონარი ინფორმაცია, რომ მზადდება სააკაშვილის მკვლელობა და მათ იციან ამის შესახებ, სასამართლოს ვთხოვთ, გამოიტანოს განჩინება, მიმართოს სახელმწიფოს ყველა სამართლდამცავ ორგანოს – ჯერ ერთი, დაადგინონ, საიდან აქვთ ეს ინფორმაცია და მერე უზრუნველყონ სააკაშვილის სიცოცხლის უსაფრთხოება. ეს არის სასამართლოს მოვალეობა.
მიმართვის წერილები დაეგზავნათ, აგრეთვე, ქართულ საზოგადოებას და უცხოელ დიპლომატებს, რომ გამოხატონ თანადგომა და აღიკვეთოს ასეთი დაანონსებული მკვლელობები საქართველოში, მით უმეტეს, საქართველოს მე-3 პრეზიდენტის“, – აცხადებს ვალერი გელბახიანი.
