დღეს, საქალაქო სასამართლოში საქართველოს მე-3 პრეზიდენტის, მიხეილ სააკაშვილის მორიგი პროცესი მიმდინარეობს. სხდომის პარალელურად მწვავე და ემოციური პოლიტიკური შეფასება გააკეთა პარტია ,,ერთიანი ნაციონალური მოძრაობის“ თავმჯდომარემ ნიკა მელიამ.
ოპოზიციონერი ლიდერის განცხადებით, თუ დაინახავენ, რომ პროცესები შეგნებულად იწელება, ერთობლივი შეთანხმებით, შესაბამის გადაწყვეტილებას მიიღებენ:
,,ნებისმიერ შემთხვევაში სავსებით შესაძლებელია, მარტივად, წლის ბოლომდე დაასრულოს საქმის განხილვა. თუ ასე არ ხდება, მაშინ კიდევ ერთხელ ვიმეორებ, ძვირფასო მეგობრებო, ეს უკვე განხილულ იქნება ყველა მხარესთან ერთად და მივიღებთ გადაწყვეტილებას – ნიშნავს თუ არა ეს უკვე, ჩვენთვის სასიკვდილო განაჩენს?
როგორ იქცევა თავმოყვარე საზოგადოება, რომლის თვალწინ კვდება და კლავენ პრეზიდენტს 30 წლის განმავლობაში უკვე რიგით მეორეს, მე ვფიქრობ, ბევრ ახსნა-განმარტებას არ საჭიროებს.
ადამიანი ყოველდღიურად მძიმდება. ეს არის ფაქტი, რაც არ უნდა თქვას კობახიძემ და ივანიშვილმა, რა მნიშვნელობა აქვს ისინი რას იტყვიან?! – ფაქტი არის ჯიუტი!
ამ ფაქტების შეფასებაში და კონსტანტირებაში ახლა გაჯიუტებას ისინი მუდმივად აპირებენ სათავისოდ, მაგრამ მადლობა ღმერთს, საზოგადოების დიდი ნაწილი აფასებს რეალობას ისე, როგორც აფასებს!“, – განაცხადა ნიკა მელიამ.
ავტორი
ნინი ხიჯაკაძე
