სახალხო დამცველი ნინო ლომჯარია ჟურნალისტებთან კომენტარს აკეთებს ქვეყანაში მიმდინარე სისხლის სამართლის საქმეებთან დაკავშირებით. მისი განცხადებით, ბევრ საზოგადოებრივი ინტერესის საქმეში ჭარბობს პოლიტიკური მდგენელი:
,,ბოლო 10 წლის განმავლობაში არ ყოფილა არცერთი მაღალი საზოგადოებრივი მნიშვნელობის სისხლის სამართლის საქმე, რომლის ბრალი და განაჩენი ჩვენ არ შეგვესწავლა. ყველა ამ მნიშვნელოვან საქმეზე ჩვენი პოზიცია დავაფიქსირეთ, წარვადგინეთ სასამართლო მეგობრის მოსაზრებები.
რაც ყველაზე სამწუხაროა, – არაერთ ასეთ საზოგადოებრივი ინტერესის საქმეში გამოვავლინეთ პოლიტიკური მდგენელი. ასევე ვთვლით, რომ ბევრ საქმეში არ იყო გამოძიების სტანდარტები დადგენილი.
დღეს ყველაზე პრობლემური საქმეები შემიძლია გავიხსენო: ეს არის ნიკა გვარამიას პატიმრობა, 5 ივლისის გამოუძიებელი/არასრულყოფილად გამოძიებული საქმე, რაზეც უახლოეს დღეებში დეტალურად გამოვაქვეყნებთ ჩვენ შეფასებებს; 20 ივნისის საქმის არაეფექტური გამოძიება; კარტოფრების საქმე, სადაც ჩვენ პირველად ვთქვით, რომ პოლიტიკური მდგენელი ჭარბობს სამართლებრივს.
ამ რეკომენდაციებში ერთ-ერთი მთავარი პუნქტი არის ის, რომ უნდა შეწყდეს მედიის წარმომადგენლების მიმართ დაუსაბუთებელი და საეჭვო დევნა, თავისუფლად უნდა შეძლოს მედიამ მუშაობა.
ნიკა გვარამიას სააპელაციო განაჩენი ჩვენ შევისწავლეთ. ასევე, დავაანონსებ, რომ ალბათ უახლოეს დღეებში გვექნება ჩვენი შემაჯამებელი პოზიცია ამ საქმესთან დაკავშირებით.
აქვე წინასწარ გეტყვით, რომ არსებითად ჩვენ ამ გადაწყვეტილებაში ვერ ვნახეთ, რომ რაიმე უფრო მეტად დასაბუთებულია. უფრო მეტიც შეიძლება ვთქვათ, რომ დღეს უფრო მეტად ვხედავთ პოლიტიკურ მდგენელს ნიკა გვარამიას საქმეში, ვიდრე აქამდე.
შეწყალებაზე, სამწუხაროდ, თქვენ იცით ჩემი პოზიცია – ეს იყო პირველი შემთხვევა, როდესაც პრეზიდენტს მე პირადად მივმართე შეწყალების თხოვნით კონკრეტული პატიმრის. იმიტომ, რომ ჩვენი საქმის შესწავლის შედეგად ჩვენ მივედით დასკვნამდე, რომ ეს იყო ერთ-ერთი ყველაზე დაუსაბუთებელი და უსამართლო გადაწყვეტილება და ბრალი, რაც კი თუნდაც ბოლო წლების განმავლობაში ჩვენ გვინახავს. ამიტომ ჩემი ეს რეკომენდაცია ქალბატონი სალომე ზურაბიშვილის მიმართ ძალაში რჩება“, – აცხადებს ნინო ლომჯარია.
ავტორი
ნინი ხიჯაკაძე
