“ტვ პირველის” ეთერში, გადაცემაში “რეაქცია”, მიხეილ სააკაშვილის შვილმა, ედუარდ სააკაშვილმა ისაუბრა მე-3 პრეზიდენტთან დაკავშირებით და დეტალურად გასცა პასუხი, ჟურნალისტ ინგა გრიგოლიას მიერ დასმულ შეკითხვას: “როგორ ფიქრობთ – სწორი აღმოჩნდა მიშას ჩამოსვლა?”
„ალბათ ძალიან დიდი შეცდომა იყო, მაგრამ პრინციპში მე არც გამკვირვებია იმიტომ, რომ, წლების განმავლობაში, ვისმენდი მის საუბარს ამაზე საჯაროდ და მეც იგივეს მეუბნებოდა. მას ამის გაკეთების ძალიან დიდი სურვილი ჰქონდა და ზოგადად მისი მიდგომა აქამდე ყოველთვის იყო, რომ ის რაღაც კრიზისებში იგდებდა საკუთარ თავს და შემდეგ უცებ პოულობდა რაღაც გამოსავალს. ვარდების რევოლუცია და ა.შ., დიდი კრიზისების გადაწყვეტით მიაღწია წარმატებას. ალბათ ეგონა, რომ კიდევ ერთხელ შეძლებდა იგივეს გაკეთებას, თუმცა მე არასდროს ვთვლიდი, რომ შექმნილ სიტუაციაში ეს იყო რეალური ან შესაძლებელი.
თუ შევხედავთ მხარდაჭერის დონეს, როგორი ხელისუფლებაა და ა.შ. უბრალოდ, ეს არ იყო რეალისტური და ძალიან სამწუხაროა, რომ მამაჩემმა თავი მოიტყუა, წლების განმავლობაში. ის არც იყო საქართველოში და მხოლოდ გაფილტრული ინფორმაცია მიდიოდა მის გონებამდე, თვითონაც ფილტრავდა – რაც უნდოდა ის ესმოდა და ამან უბიძგა მას უდიდესი შეცდომის დაშვებისკენ, რასაც, მე მგონი, ძალიან, ძალიან ნანობს ამას თავადაც. მის ადგილას მეც ვინანებდი, მაგრამ…
მგონი სწორედ ესაა მიზეზი, რატომაც ის ამას არ გაიმეორებს მომავალში იმიტომ, რომ იმდენად დიდი ტრავმა მიიღო ამის შედეგად და აშკარად მოუწია რეალობის უკეთ დანახვა“, – განაცხადა ედუარდ სააკაშვილმა.