“ნაციონალურ მოძრაობაში” მიმდინარე პროცესებთან დაკავშირებით პოზიციას აფიქსირებს საპარლამენტო უმრავლესობის წევრი, საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, მიხეილ სარჯველაძე:
“გარკვეული ჯგუფები და დაჯგუფებები არსებობენ, რომლებსაც ერთმანეთთან სრულიად არათავსებადი ინტერესები აქვთ, თუმცა ერთადერთი გამაერთიანებელი აქვთ, რომ ყველა მათგანი დესტრუქციულია და ყველა მათგანი საზრდოობს ხელისუფლებაში ყოფნისა და გავლენების ქონის ერთადერთი დაუოკებელი სურვილით.
ასეთ ფონზე გასაგებია, რომ ისინი ეცდებიან ერთმანეთის ძალაუფლების მიტაცებას, იმისთვის რომ ერთგვარი ბუტაფორიული სიძლიერის შთაბეჭდილება შექმნან.
ამ გზით, მაგალითად, ახალაიას თუ მერაბიშვილის ჯგუფი შეეცდება, რომ რაღაცნაირად თავი მოუყაროს ნარჩენებს, რაღაცა ფორმა მისცეს ამას ყველაფერს და წარმოდგეს როგორც სამართალმემკვიდრე “ძლევამოსილი” “ნაციონალური მოძრაობისა”.
ამგვარი სიმულაციების შექმნას შეეცდებიან იმისთვის, რომ სულ არ დაკარგონ ის ნარჩენი ხმები და ნარჩენი მხარდაჭერა, რომელიც ჯერ კიდევ საზოგადოებაში შეიძლება ჰქონდეთ,” – აცხადებს მიხეილ სარჯველაძე.
