პარლამენტის იურიდიულ საკითხთა კომიტეტის თავმჯდომარემ ანრი ოხანაშვილმა ტელეკომპანია ,,იმედის” ეთერში, გადაცემა ,,იმედი Live”-ში პოლიტიკური შეფასება გააკეთა ევროსაბჭოს 12 რეკომენდაციაში ასახულ დეოლიგარქიზაციის კანონპროექტთან დაკავშირებით:
,,ეს არის ერთ-ერთი ამოცანა 12 პუნქტიან გეგმაში – დეოლიგარქიზაციის საკითხი. ჩვენი სწორება თავიდანვე იყო, რომ თითოეული პუნქტი ყოფილიყო შესრულებული, რომ არავისთვის მიგვეცა სასპეკულაციო საფუძველი არც გარეთ მოქმედი ძალებისთვის, რომლებიც არ არიან ჩვენი ქვეყნის ინტერესების შესაბამისად კეთილგანწყობილნი და არც ამ შიდა რადიკალური ჯგუფებს. წერტილი უნდა დაესვას ყოველგვარ სპეკულაციას! როგორც ყველა სხვა ამოცანა, ესეც უნდა შესრულდეს.
რატომ უკრაინული მოდელი? რატომ კანონი? – იცით, რომ უკრაინა არის ერთადერთი ქვეყანა, რომელსაც აქვს ეს კანონი მიღებული. ჩვენ რომ დაგვეწყო რაღაც ახალი გამოგონება და გვეთქვა, რომ ქართული მოდელი უნდა შევქმნათ, აქ დაიწყებოდა, სრული პასუხისმგებლობით შემიძლია გითხრათ, სპეკულირება, რომ რატომ წერთ თქვენ თქვენ ვერსიას?! ხომ არ არგებთ ვინმეს? რატომ არ იყენებთ უკრაინულ მოდელს?!
ეს უკრაინული მოდელი ჩვენ გადმოვაკოპირეთ, გადმოვიტანეთ, ვინაიდან ამ ოლიგარქიის ფენომენი, გამოწვევა და პრინციპები ყველა ქვეყანაში ერთნაირია.
ჩვენ დავეყრდენით, ასევე, ევროპული სტრუქტურების ოფიციალურ განცხადებებს, რომ კანონის მიღება არის კარგი.
რაც შეეხება კანონის მიღების პროცედურას და შემდგომ სამართლებრივ შედეგებს – მეორე მოსმენით იურიდიულ საკითხთა კომიტეტზე დავაინიცირეთ, განვიხილეთ ეს კანონპროექტი და მივიღეთ. მომდევნო კვირას ჩვენ გვაქვს უკვე პლენარული სხდომა და მეორე მოსმენით იქნება მიღებული. ჩვენ მომდევნო კვირიდან 2 კვირის თავზე, სამი მოსმენით გვექნება მიღებული.
რაც შეეხება ამოქმედების ვადას, როგორც უკრაინაში, აქაც საჭიროა გარკვეული გარდამავალი პერიოდი. მაქსიმუმ 6 თვის თავზე უნდა ამოქმედდეს ეს რეგულაციები”, – განაცხადა ანრი ოხანაშვილმა.
ავტორი
ნინი ხიჯაკაძე
