ფრაქცია ,,ერთიანი ნაციონალური მოძრაობა – ძალა ერთობაშიას” წევრი ლევან ხაბეიშვილი განცხადებას აკეთებს პარტიის წევრების მიერ გაკეთებულ განცხადებასა და მოთხოვნაზე, რომ ჩატარდეს ყველა დონის არჩევნები. ოპოზიციონერი ლიდერის განცხადებით, ახლა მნიშვნელოვანია ამ პროცესის სწრაფად დაორგანიზება:
,,მივესალმები ჩემი კოლეგების, ჩემი მეგობრების, თანამებრძოლების ინიციატივას, რომელიც უკავშირდება პარტიაში მეტ გახსნილობას, ღიაობას, განახლებას, პარტიის თავმჯდომარის არჩევას, რაც ძალიან მნიშვნელოვანია.
მივესალმები ამ ინიციატივას რომ დაეთანხმა პარტიის თავმჯდომარე, რომელმაც თქვა, რომ იქნება პარტიის თავმჯდომარის არჩევნები.
ახლა ძალიან მნიშვნელოვანია, რომ ეს ყველაფერი მოხდეს და დავაორგანიზოთ სწრაფად. იმიტომ, რომ დასაკარგი დრო არც ,,ნაციონალურ მოძრაობას”, არც ქართველ ხალხს არ აქვს.
სხვათაშორის ,,ნაციონალური მოძრაობა” არის პარტია, რომელიც გადამწყვეტ როლს შეასრულებს რუსი ოლიგარქის და მისი კრიმინალური ხელისუფლების დასრულებაში.
სწორედ ამიტომ, ამ პარტიას სჭირდება გადახალისება, ამ პარტიის თავმჯდომარეს, ვინც იქნება, სჭირდება ლეგიტიმაცია.
ყველას მოგიწოდებთ, ვისაც რაიმე პრეტენზია გაგაჩნიათ, რომ ,,ნაციონალური მოძრაობა” უნდა იყოს ძლიერი, წამოაყენეთ კანდიდატურები და შედით გადამწყვეტ ბრძოლაში, მათ შორის პარტიის გალიერებისთვის”, – განაცხადა ლევან ხაბეიშვილმა.
ინფორმაციისთვის: გუშინ, 9 ნოემბერს ,,ერთიანი ნაციონალური მოძრაობის” რეგიონალურმა ლიდერებმა წამოაყენეს ინიციატივა, რომ ჩატარდეს შიდა არჩევნები ყველა დონეზე. მოგვიანებით აღნიშნულ წინადადებას, პარტიის თავმჯდომარის ხელახალ არჩევნებს დაეთანხმა მოქმედი თავმჯდომარე ნიკა მელია.
ავტორი
ნინი ხიჯაკაძე
