პარლამენტში სახალხო დამცველობის კანდიდატებთან ოპოზიციონერი ქალი დეპუტატების ინიციატივით გამართულ შეხვედრაზე მარიკა არევაძემ საკუთარ ხედვებსა და გეგმებზე ისაუბრა. შეხვედრის მთავარ თემას, ქალთა და ბავშვთა მიმართ ძალადობა, შეზღუდული შესაძლებლობის მქონე პირთა უფლებების დაცვა და ევროკავშირის რეკომენდაციების მე-9 პუნქტის შესრულების მიმართ კანდიდატების ხედვების გაცნობა და მათი მოსაზრებების მოსმენა წარმოადგენდა.
სახალხო დამცველობის კანდიდატმა, მარიკა არევაძემ ქალთა უფლებების დაცვისა და ფემიციდის აღკვეთის მიმართულებით საკანონმდებლო ცვლილებების საჭიროებაზე და რეგულაციების რეალურ აღსრულებაზე გაამახვილა ყურადღება. მისი განმარტებით, საჭიროა შესაბამისი სახელმწიფო სტრუქტურების და სამოქალაქო სექტორის წარმომადგენლებით დაკომპლექტებული მუდმივმოქმედი ჯგუფის შექმნა, რომელიც აღნიშნულ საკითხებზე იმუშავებს:
„ქალთა უფლებების დაცვისა და ფემიციდის აღკვეთის თვალსაზრისით მნიშვნელოვანია საკანონმდებლო ცვლილებები, უკვე არსებული საკანონმდებლო რეგულაციების რეალური აღსრულება (მაგალითად, ელექტრონული სამაჯურების პრაქტიკაში გამოყენება) და სამოქალაქო ცნობიერების ამაღლებაზე მუდმივი მუშაობა.
გარდა ამისა, საჭიროა ამ მიმართულებით მომუშავე სამთავრობო სტრუქტურების, არასამთავრობო სექტორის და კონკრეტული მიმართულებით მომუშავე ადვოკატებისგან მუდმივმოქმედი სამუშაო ჯგუფის შექმნა,“ – განაცხადა შეხვედრაზე სიტყვით გამოსვლისას მარიკა არევაძემ.
ომბუდსმენობის კანდიდატი მიიჩნევს, რომ მნიშვნელოვანია თემატურ საკითხებზე ამ ტიპის განხილვები კიდევ გაიმართოს, რაც საკანონმდებლო ორგანოს წარმომადგენლებს დაეხმარება სახალხო დამცველის თანამდებობაზე აირჩიონ ყველაზე ღირსეული, პროფესიონალი და დამოუკიდებელი კანდიდატი.
