ხელისუფლების, მმართველი პარტიის წარმომადგენლებისთვის ფარულ მოსმენებთან დაკავშირებით მედიაში გავრცელებულ მასალებზე ჟურნალისტებთან კომენტარი გააკეთა საქართველოს პრემიერ-მინისტრმა, ირაკლი ღარიბაშვილმა. მთავრობის მეთაურმა განაცხადა, რომ ეს თემა მისთვის არაა საინტერესო:
“ე.ი. “ქართულ ოცნებას” უსმენს მთელი საქართველო, სუს-იც უსმენს საქართველოს ხმას. ჩვენ ვართ მმართველი ძალა… მე არ მინდა, რომ კომენტარი გავაკეთო ვიღაცეების მიერ დამონტაჟებულ რაღაც საუბრებზე, ეს არ არის საინტერესო.
ერთ რამეს გეტყვით, მოსმენებზე მინდა გითხრათ შემდეგი: ნებისმიერი ქვეყნის მაგალითი დაამუშავეთ და თქვენ ნახავთ, რომ დღეს მსოფლიოში პრივატულობა არის ძალიან მოწყვლადი საკითხი. ნებისმიერ ქვეყანას აქვს მოსმენების საშუალება და ეს ძალიან მარტივია.
ძალიან ბევრი მაგალითი გვაქვს ჩვენ, მათ შორის, ჰაკერების, ძალიან ბევრი კონსპირაციული, ჰაკერული ორგანიზაცია არსებობს, რომლებსაც აქვთ საშუალება “გატეხონ” თქვენი მობილური ტელეფონი, მოგისმინონ, მოიპარონ მთელი DATA ანუ მონაცემთა ბაზა და ა.შ. ამაზე არ მინდა რომ ვილაპარაკო, ეს მინდა აგიხსნათ.
არავინ არ უსმენს ხელისუფლების წარმომადგენლებს, ეს ტყუილია. მე გეტყვით, რომ ეს თემები არ არის ჩემთვის საინტერესო. გამოძიებისთვის თუ რაიმე იქნება საინტერესო, გამოძიება გასცემს პასუხს“, – განაცხადა ირაკლი ღარიბაშვილმა.
