ამერიკის შეერთებული შტატების ელჩმა დღეს კიდევ ერთხელ გააკეთა კომენტარი ორგანიზაცია “სამართლიან არჩევნებთან” მიმართებაში და დააფიქსირა მხარდაჭერა. მიუხედავად იმისა, რომ დედაქალაქის მერს, კახა კალაძეს, როგორც თვითონ აღნიშნავს, არ მოუსმენია ელჩის განცხადება, მისი პოზიცია ისევ კატეგორიულად ნეგატიურია აღნიშნულ ორგანიზაციასთან დაკავშირებით:
“არ მომისმენია განცხადება და არ ვარ დარწმუნებული, რომ ამერიკის საელჩო ამ განცხადებას გააკეთებდა იმიტომ, რომ ISFED ასოცირებულია თაღლითურ ორგანიზაციასთან. ეს არ არის უბრალოდ ჩემი სიტყვები, ეს დადასტურებული ფაქტებია.
ეს ორგანიზაცია დაკავებული იყო არჩევნების შედეგების გაყალბებით ანუ მეორადი დათვლის შედეგებისას, რომელსაც ისინი აკეთებდნენ, არასწორი ინფორმაცია მიაწოდეს საზოგადოებას, საზოგადოების შეცდომაში შეყვანის მიზანმიმართული მცდელობა იყო. ყველაზე რბილად რომ ვთქვათ და შევაფასოთ მათი ეს ქმედება, იგი იყო თაღლითობა.
რა თქმა უნდა, ამას უნდა მოჰყოლოდა ჩაღრმავება, კიდევ უფრო დეტალებში წასვლა, აღძრულიყო სისხლის სამართლის საქმე და პასუხი უნდა მოეთხოვათ ყველასთვის. მხოლოდ ხელმძღვანელის გადადგომით შემოიფარგლა ამ საქმის ჩახურვა, მე ეს არ მიმაჩნია სწორად. დღესაც არ არის გვიან. მომხდარს სჭირდება დეტალებში შესვლა იმოტომ, რომ ეს პირდაპირ მიუთითებს იმაზე, ეს იყო იმ რევოლუციური სცენარის ნაწილი, რომელსაც ამზადებდა ოპოზიცია,” – განაცხადა კახა კალაძემ.
ინფორმაციისთვის: საქართველოში აშშ-ს ელჩმა, კელი დეგნანმა დღეს 2020 წლის საპარლამენტო არჩევნების შეფასება გააკეთა და კრიტიკული პოზიცია დააფიქსირა არჩევნების სამართლიანობასთან მიმართებაში. ამასთან ელჩი ორგანიზაცია “სამართლიან არჩევნებს” კიდევ ერთხელ უცხადებს მხარდაჭერას.
