,,ქართული ოცნებიდან” წასულმა დეპუტატებმა ჟურნალისტებთან გაკეთებულ განცხადებაში დაანონსეს ახალი მოძრაობის შექმნა. როგორც სოზარ სუბარი აღნიშნავს, აღნიშნულის გადამწყვეტი ფაქტორი აღმოჩნდა მმართველი პარტიის დამფუძნებლის ბიძინა ივანიშვილის წერილი:
,,გუშინ გამოქვეყნებულ წერილში ბიძინა ივანიშვილმა დაადასტურა ის, რასაც ჩვენ ამდენი ხანი ვამბობთ, რომ ძალიან რეალური იყო საქართველოს ომში ჩართვის საფრთხე და დღეს მართალია ეს საფრთხე შენელდა, მაგრამ ბოლომდე არ არის აღმოფხვრილი.
საფრთხე არსებობს და როდესაც ჩვენს რეგიონში ასეთი მძიმე ბრძოლა ხდება, ყველაზე დიდი ომი ევროპის კონტინენტზე მეორე მსოფლიო ომის შემდეგ, რა თქმა უნდა, ყოველწუთიერად არსებობს საფრთხე, იმისა რომ ამ ომში საქართველო აღმოჩნდეს ჩათრეული.
ჩვენ ყველაფერი უნდა გავაკეთოთ იმისთვის, რომ ეს ომი ავაცილოთ თავიდან ჩვენს ქვეყანას, ჩვენს ხალხს და ამისთვის ზოგჯერ საჭიროა, რომ ის, რაც ხდება კულისებში; ის, რაც ხდება საჯარო პოლიტიკის მიღმა, გადმოვიტანოთ საზოგადოების სამსჯავროზე. საზოგადოებას ვუთხრათ მეტი სიმართლე, მივაწოდოთ მეტი ინფორმაცია, რადგან სწორედ დახურულ პოლიტიკაში არის ყველაზე დიდი საფრთხე, რომ მიღებულ იქნას ისეთი გადაწყვეტილებები, რაც არ იქნება ჩვენი ქვეყნისთვის სასარგებლო, პირიქით – იქნება დამანგრეველი.
სწორედ გუშინდელი წერილიდან და დღევანდელი, ელჩის პასუხიდან გამომდინარე გადავწყვიტეთ, რომ ეს ჩვენი ურთიერთობები, რომლებიც ამდენი ხნის განმავლობაში გვქონდა ჩვენს წარმომადგენლებთან რეგიონში ერთმანეთთან, გარკვეული წილად ფორმალური ხასიათი მიგვეცა და საზოგადოებრივ მოძრაობად ჩამოვაყალიბოთ, რომლის მიზანი იქნება ვიბრძოლოთ იმისთვის, რომ საჯარო პოლიტიკაში ძალიან ბევრ კითხვას გაეცეს პასუხი, რაზეც აქამდე პასუხები ხშირად არ იძლეოდა და ყველაფერი გავაკეთოთ იმისთვის, რომ საქართველოს ავაცილოთ თავიდან ომის საფრთხე და საქართველოს ევროპული გზა, საქართველოს ევროპაში ინტეგრაციის პროცესი იყოს შეუქცევადი.
ცხადია, თუ მოხდება ომი, ამ შემთხვევაში ვერანაირ ევროპაზე, NATO-ზე, ევროკავშირზე – ვერ ვილაპარაკებთ. საქართველოს სახელმწიფოებრიობა რამდენი ხნით გაუქმდება და როდის შევძლებთ აღდგენას – ეს იქნება ჩვენი ერთადერთი ამოცანა და საფიქრალი. ამიტომ ჩვენ ყველაფერს გავაკეთებთ, რომ ეს საფრთხე ავაცილოთ თავიდან”, – განაცხადა სოზარ სუბარმა.
ავტორი
ნინი ხიჯაკაძე
