,,ერთიანი ნაციონალური მოძრაობის“ პოლიტიკური საბჭოს წევრი, პარლამენტის დეპუტატი ლევან ხაბეიშვილი განცხადებას აკეთებს საქართველოში საწვავის ფასის მაღალ ნიშნულთან დაკავშირებით და კონკრეტულ პიროვნებებს ასახელებს, რომლებიც კურირებენ ქვეყანაში ნავთობის შემოტანას:
,,უკიდურესად იზრდება საქართველოში საწვავის ფასი. იმ ფონზე, როცა უკიდურეს გაჭირვებაში მყოფ საქართველოს მოქალაქეებს უწევთ ისტორიულად ძვირი ფასის გადახდა საწვავში. ვგულისხმობ ბენზინს, დიზელს…
ამასობაში ჩვენ გუშინ კიდევ ერთი ფაქტი ვნახეთ, როცა საქართველოს ხელისუფლება, ბიძინა ივანიშვილი ყველაფერს აკეთებს იმისთვის, რომ სანქციების გვერდის ავლით საქართველოში მოხვდეს რუსული სანქცირებული ნავთობი. გუშინ ეს ,,გალფმა“ ფაქტობრივად დაადასტურა და თქვა, რომ დიახ, ,,როსნეფტის“ სანქცირებული ნავთობი შემოაქვთ საქართველოში.
ეს პირდაპირ ნიშნავს რუსულ ეკონომიკაში ჩასხმულ თანხებს ანუ ჩვენი ოკუპაციის, ჩვენი ტერიტორიების დაკარგვის, მცოცავი ოკუპაციის გაძლიერებას, უკრაინელი ხალხის – ჩვენი დების, ძმების მკვლელობაში თანამონაწილეობას. ამ ყველაფერს აკეთებს საქართველოს ხელისუფლება.
მნიშვნელოვანია საზოგადოებამ იცოდეს, ,,გალფის“ მთავარი პატრონი საქართველოში, მიკიბ-მოკიბვის გარეშე, არის ბატონი ლილუაშვილი, სახელმწიფო უსაფრთხოების სამსახურის ხელმძღვანელი, რომელმაც თავის დროზე ბატონი ვლადიმერ ხუნდაძე დანიშნა ფინანსთა სამინისტროში, რომელიც კურირებს საბაჟოზე ამ ტვირთების გატარება/არგატარების საკითხს.
ასევე მნიშვნელოვანია ფოთის პორტში ერთი ფეოდალი კაცი, ბიძინა ივანიშვილის მთავარი საყრდენი – ვანო ჩხარტიშვილის ინტერესები, რომელიც უზრუნველყოფს ფოთის პორტში მსგავსი ტვირთების მიღებას, გატარებას და ამ კრიმინალური საქმიანობის განხორციელებას“, – განაცხადა ლევან ხაბეიშვილმა.
ავტორი
ნინი ხიჯაკაძე
