პარლამენტის ფრაქცია ,,ქართული ოცნების“ თავმჯდომარე მამუკა მდინარაძე მწვავე კომენტარს აკეთებს ევროპარლამენტში გამართულ დებატებთან მიმართებაში და ევროპარლამენტარების კრიტიკულ შეფასებებზე საქართველოში მედიის თავისუფლებასთან დაკავშირებით:
,,ეს არ იყო კრიტიკა, ეს იყო შეტევა საქართველოზე, საქართველოს ხელისუფლებაზე. ძალიან სამწუხაროა, რომ ლობირება ამ დებატების გახსნისა მოხდა მაინც და მაინც ახლა, როცა ყველაზე ნაკლებად სასურველი იყო ამ ქვეყნისათვის. მაინც და მაინც ახლა წამოვიდა ეს შეტევა საქართველოზე, როდესაც რამდენიმე დღეში გადაწყვეტილებას ველოდებით.
ეს არის ევროპის საბჭოს საპარლამენტო ანსამბლეის აპრილის ბოლოს მიღებული რეზოლუცია, თვენახევარიც არ არის გასული. რეზოლუციაში, სადაც საუბარია საქართველოს მიერ ნაკისრი მოვალეობების და ვალდებულებების შესრულებაზე. წერია, რომ საქართველოში მედია გარემო არის კარგი – გამოხატვისა და მედიის თავისუფლება ზოგადად არის კარგად დაცული. მიესალმება ანსამბლეა მიღწეულ პროგრესს მედია გარემოს გაძლიერების კუთხით – წარმოიდგინეთ! განსაკუთრებით მედია ბაზარზე შესვლის ბარიერების შემცირებას, რაც მნიშვნელოვანი პირობაა მრავალფეროვანი მედია გარემოსათვის.
როდესაც 1 თვის წინ ასეთი ცალსახად პოზიტიური დასკვნა გამოდის ევროპის მხრიდან, ამ 1 თვის განმავლობაში საქართველოში რა მოხდა ისეთი, რომელმაც აბსოლუტურად შეცვალა დამოკიდებულება?! რა მოხდა ისეთი, რომელმაც შექმნა რაღაც არმაგედონის ფონი?!
სინამდვილეში შეიცვალა ერთადერთი რამ – გაჩნდა ინტერესი, რომ საქართველოს შეექმნას ხელოვნური ბარიერები იმ პროცესთან დაკავშირებით, რაც ახლა მიდის. რა დროს ამ რეზოლუციის პროექტის და რა დროს ამ დებატების დარეგისტრირება იყო?!
ეს არის პირდაპირ ვთქვათ, მავნებლობა იმ პროცესის მიმართ, რომელსაც საქართველოსთვის კანდიდატის სტატუსის მინიჭების პროცესი ჰქვია. ამ დაბრკოლებებს ქმნიან ქვეყნის გარედან ,,ნაცმოძრაობის“ მეგობრები და დავალების მიმცემები“, – განაცხადა მამუკა მდინარაძემ.
ავტორი
ნინი ხიჯაკაძე
