“სტრატეგია აღმაშენებლის”, “რესპუბლიკური პარტიის” და თავისუფალი დემოკრატების” ლიდერები ირლანდიაში ალდეს შეხვედრაზე გაემგზავრნენ. როგორც გიორგი ვაშაძე აცხადებს შეხვედრას ევროკავშირის წევრი რამდენიმე ქვეყნის პრემიერ მინისტრი, საგარეო საქმეთა მინისტრები და ევროპარლამენტარები დაესწრებიან. ოპოზიციონერი ლიდერის თქმით, ახლა მთავარია ყველამ დაუჭიროს მხარი საქართველოს ევროკავშირის კანდიდატის მიღების საკითხს, რადგან ქართველი ხალხი იმსახურებს ამას:
“მივდივართ “ალდეს” ევროპული ოჯახის პარტიების შეკრებაზე, სადაც ათასამდე დელეგატი მიიღებს მონაწილეობას. შეხვედრაზე იქნებიან ევროკავშირის წევრი სამი ქვეყნის პრემიერ მინისტრი, ასევე რამდენიმე საგარეო საქმეთა მინისტრი და ასამდე ევროპარლამენტარი.
მთავარი საკითხი არის, რომ “ქართული ოცნების” გადამკიდე ძალიან მძიმე მდგომარეობაა ევროკავშირის კანდიდატის მიღების საკითხთან დაკავშირებით და ჩვენი მთავარი გზავნილი იქნება, რომ საქართველო იმსახურებს გახდეს ევროპული ოჯახის წევრი.
ძალიან ბევრი შეხვედრა გვაქვს დაგეგმილი, რომ უფრო მეტი და მეტი მხარდაჭერა გამოიკვეთოს საქართველოსთან მიმართებით. დიახ, ახლა ის დროა, როდესაც ჩვენ ყველაფერი უნდა გავაკეთოთ იმისთვის, რომ დავარწმუნოთ ჩვენი ევროპელი პარტნიორები საქართველოს მხარდაჭერაში, რათა მივიღოთ ევროკავშირის წევრობის კანდიდატის სტატუსი. გვერდზე უნდა გავწიოთ ის, რაც ცუდი გაკეთდა ბოლო წლების მანძილზე და ვთქვათ მთავარი, ქართველი ხალხი იმსახურებს კანდიდატის სტატუსს და რადგანაც ხელისუფლება არაფერს აკეთებს ჩვენ მაქსიმუმი უნდა შევძლოთ. ეს არის “სტრატეგია აღმაშენებელის” მიზანი. აუცილებლად მინდა, რომ კონკრეული რეზოლუცია იყოს მიღებული, რომელიც მხარს დაუჭერს ევროკავშირში საქართველოს გაწევრიანებას” – აცხადებს გიორგი ვაშაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახურ ავრცელებს
