ორგანიზაცია “ანტიკორუფციული მოძრაობა” ინფორმაციას ავრცელებს პარტია “კონსერვატიული მოძრაობი”-სთვის 11 აპრილიდან – 25 მაისის ჩათვლით განხორციელებული შემოწირულობის თაობაზე და პარტიასთან დაკავშირებით კონკრეტულ ფაქტებზე საუბრობს:
“ა/წ 11 აპრილიდან – 25 მაისის ჩათვლით მოქალაქეთა პოლიტიკურ გაერთიანება ,,კონსერვატიულ მოძრაობამ’’ იგივე ალტ-ინფომ 107 954 ლარის შემოწირულობა მიიღო.
პრორუსულ და რასისტულ პარტიას სულ 63 პირმა შეწირა თანხა, აქედან ახალი შემომწირველი 17 პირია, ხოლო 47 პირი სისტემატიურად სწირავს თანხას.
შემომწირველებიდან სამეწარმეო საქმიანობა უფიქსირდება 10 პირს, ხოლო 53 პირს სამეწარმეო საქმიანობა არ უფიქსირდება, რაც აჩენს საფუძვლიან ეჭვს რომ შემომწირველები კუთვნილ შემოსავალს არ სწირავენ და საქმე გვაქვს კანონდარღვევასთან – უკანონო შემოწირულობასთან, რასთან დაკავშირებითაც სახელმწიფო აუდიტის პოლიტიკური ფინანსების მონიტორინგის სამსახურისგან მოვითხოვთ დაიწყონ მოკვლევა“, – განაცხადა ანტიკორუფციული მოძრაობის აღმასრულებელმა დირექტორმა ლაშა ფარულავამ.
“კონსერვატიული მოძრაობის შემომწირველს, მეწარმე გია გოთუას კომპანიებს: ,,ივერია 77’’ და ,,ივერია 7’’ -ს სახელმწიფო შესყიდვების გზით 11 180 365 ლარის ღირებულების ტენდერი აქვს მიღებული, გამარტივებული შესყიდვით 49 416 ლარი აქვს მიღებული.
სახელმწიფო შესყიდვების სააგენტოსგან მოვითხოვთ მეწარმეები და მათი კომპანიები, რომლებიც ანტისახელმწიფოებრივ პოლიტიკურ პარტიას სწირავენ თანხას შეიყვანონ შავ სიაში”, – განაცხადა ირაკლი ფავლენიშვილმა.