“სტრატეგია აღმაშენებლის” თავმჯდომარემ პარლამენტის სხდომათა დარბაზის ტრიბუნიდან ევროინტეგრაციის პროცესზე ისაუბრა. გიორგი ვაშაძის განცხადებით დღეს ქვეყანას ისტორიული შანსი აქვს, რომელიც აუცილებლად გამოსაყენებელია. ოპოზიციონერი ლიდერის აზრით ყველაფერი უნდა გაკეთდეს რათა საქართველო გახდეს ევროპული ოჯახის წევრი:
“უმძიმეს ვითარებაში დაიწყო 2022 წელი. ჩვენი მტრის, რუსეთის, მხრიდან მოხდა თავდასხმა ჩვენს მოძმე ერზე – უკრაინაზე, ათობით ათასი ადამიანი გაჟლიტა და გენოციდი მოაწყო 21-ე საუკუნეში. ამ უმძიმეს ვითარებაში ჩვენ მოგვეცა ისტორიული შანსი, რომ დავახლოვდეთ ევროპასთან, მივიღოთ ევროკავშირის კანდიდატის სტატუსი. ისტორიულ შანსთან ერთად ეს არის უდიდესი პასუხისმგებლობა, რომელიც თითოეულ ამ დარბაზში მყოფთ, თითოეულ საქართველოს მოქალაქეს გვაქვს ჩვენი ისტორიის, ჩვენი აწმყოს და ჩვენი მომავლის წინაშე.
მეგობრებო, ევროკავშირი ეს არის საქართველოს ეროვნული ენერგიის რეალიზების შესაძლებლობა, ევროკავშირი და ევროპაში ინტეგრაცია ეს არის ის გაჭირვებული ყოფის ერთხელ და სამუდამოდ დამარცხების შესაძლებლობა, რომელიც ქვეყანაშია.
ევროკავშირი ეს არის განვითარებული ქალაქი და სოფელი საქართველოში.
ევროკავშირი ეს არის უამრავი ინვესტიციები, ძლიერი ოჯახი, ქართველი ემიგრანტების დაბრუნება, საქართველოში და რაც მთავარია ევროკავშირი ინტეგრაცია ეს არის გზა საქართველოს ტერიტორიული მთლიანობისკენ“, – განაცხადა გიორგი ვაშაძემ.
პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური
