ოპოზიციონერი პოლიტიკოსი გიგი უგულავა სოციალურ ქსელში პოსტს აქვეყნებს ე.წ. “ჩელენჯის” (challenge) შეთავაზებით და ფეისბუქის პირადი გვერდიდან მიმართავ მედიის ცალკეული წარმომადგენლებსა და 4 პოლიტიკურ პარტიას, რომ მუდმივად, მათ ნებისმიერ გადაცემასა თუ გამოსვლაში მუდმივად იყოს საუბარი მიხეილ სააკაშვილზე:
“მეგობრებო, თანამოაზრე პოლიტიკოსებო და ტელევზიით ხშირად მოსაუბრენო😍
მინდა ასეთი იდეა (challenge) გაგიზიაროთ:
ყოველი სატელევიზიო ჩართვა, პარტიული ბრიფინგი გავმართოთ რუსთავის ციხიდან.
ყოველი გამოსვლა, სულ რომ ამინდზე, ტრიგონომეტრიაზე ან მფრინავ სპილოებზე გვიწევდეს, საუბარი დავიწყოთ და დავასრულოთ მიხეილ სააკაშვილის განთავისუფლების მოთხოვნით. მეტიც თავად ციხის ფონზე საუბარი უკვე მეტყველი გზავნილია – თავისუფლება მიშას.
მესმის, ლოჯისტიკურად შესაძლოა რთულია, მათ შორის ტელევიზიებისთვისაც. სახლიდან, სტუდიიდან გაცილებით მოსახერხებელია საუბარი. დრო, საწვავი და ნერვები ნაკლებად იხარჯება, მაგრამ, ვფიქრობ, რომ ეს თუნდაც მცირედი ძალისხმევა ძალიან მნიშვნელოვანია პუტინისა და ივანიშვილის ტყვეს, მიხეილ სააკაშვილის, დასახსნელად.
მნიშვნელოვანია პატიმრის გასამხნევებლად, მნიშვნელოვანია ამ უსამართლო და ისტორიული სირცხვილის ჩამოსარეცხად, მნიშვნელოვანია რომ ეს თემა მუდმივად იყოს დღის წესრიგში, სანამ არ მივაღწევთ მიზანს.
ერთი მერცხალი გაზაფხულს ვერ მოიყვანს, მაგრამ თუ ბევრნი დავნერგავთ ამ ძალიახმევას, მე დარწმუნებული ვარ რომ ის ამაოდ არ ჩაივლის“, – წერს ფეისბუქის პირად გვერდზე გიგი უგულავა და ამასთან ერთად სოციალურ ქსელში მონიშნა მედიის ცალკეული წარმომადგენლები და 4 პოლიტიკური პარტია.