ევროპული ინტეგრაციის საკითხთან დაკავშირებით, “სტრატეგია აღმაშენებელმა” და რესპუბლიკურმა პარტიამ არასამთავრობო ორგანიზაციის წარმომადგენლებთან შეხვედრა გამართა. ბრიუსელიდან დაბრუნებულმა გიორგი ვაშაძემ ხაზი გაუსვა იმ ფაქტს, რომ „ქართული ოცნება“ თანამშრომლობაზე უარს აცხადებს არამხოლოდ „სტრატეგია აღმაშენებელთან“ და ოპოზიციასთან, არამედ სამოქალაქო სექტორთანაც. ოპოზიციონერი ლიდერის თქმით სამოქალაქო სექტორთან შეხვედრაზე იმსჯელეს იმ შესაძლებლობებზე, რაც ახლა აქვს საქართველოს, რომ ხელიდან არ გაუშვას ევროპასთან ინტეგრაციის შესაძლებლობა:
„ჩვენ, ოპოზიციას და სამოქალაქო სექტორსაც „ქართული ოცნება“ უარს ეუბნება თანამშრომლობაზე ევროკავშირში ინტეგრაციასთან დაკავშირებით. დღეს სამოქალაქო სექტორთან ერთად ვმსჯელობთ – რა შეგვიძლია გავაკეთოთ, რომ ერთის მხრივ ის შესაძლებლობა ევროპული ინტეგრაციის, რომელიც ახლა გვაქვს არ გავუშვათ ხელიდან, მეორე მხრივ ვაიძულოთ „ქართული ოცნება“ გადაიდგას კონკრეტული ნაბიჯები ამ მიმართულებით?
მმართველ პარტიას არ უნდა მივცეთ შესაძლებლობა მეორეხარისხოვანი თემებით გადაფაროს საქართველოს ევროკავშირში ინტეგრაციის საკითხი. ჩვენ, ქართველ ხალხს, ევროინტეგრაციის არჩევანი გაკეთებული გვაქვს და თუ გვსურს ევროკავშირის წევრი გავხდეთ, ამისთვის ნაბიჯები უნდა გადაიდგას რეფორმების კუთხით, შესაბამისად საპასუხოდ – დაჩქარებული წევრობა, დაჩქარებული რეფორმები და ერთიანობა. ამ ერთობას, დარწმუნებული ვარ, მივაღწევთ სამოქალაქო სექტორთან და საქართველოს სხვა მოქალაქეებთან ერთად“, – განაცხადა გიორგი ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
