გიორგი ვაშაძე, ხათუნა სამნიძე და თამარ კეკენაძე ბრიუსელში ოფიციალური ვიზიტით გაემგზავრნენ
მშვიდობა და უსაფრთხოება საქართველოში და ევროკავშირში დაჩქარებული წესით კანდიდატების მიღება – ამ თემებზე იმსჯელებენ “სტრატეგია აღმაშენებლის”, “რესპუბლიკური პარტიისა” და “თავისუფალი დემოკრატების” თავმჯდომარეები ბრიუსელში. ოფიციალური ვიზიტის ფარგლებში ოპოზიციონერი ლიდერები გიორგი ვაშაძე, ხათუნა სამნიძე და თამარ კეკენაძე მაღალი რანგის წარმომადგენლებს შეხვდებიან. ნატოს სამიტის პარალელურად შეხვედრები ექნებათ აშშ-ს წარმომადგენლებთან და ასევე “ალდეს”-სთანაც, სადაც ასევე წევრიანდება ვოლოდიმერ ზელენკის პარტია “ხალხის მსახური”-ც. როგორც გიორგი ვაშაძე აცხადებს, ოპოზიციონერ დეპუტატებს ევროპელ კოლეგებთან ექნებათ თხოვნა, რომ “ქართული ოცნების” უმსგავსო განცხადებები მხედველობაში არ მიიღონ, რადგან ქართველი ხალხი იმსახურებს გახდეს ევროკავშირის წევრი ქვეყანა:
“სამწუხაროა, რომ “ქართულმა ოცნებამ” ბრიუსელში ერთობლივ ვიზიტზე უარი თქვა, რომელიც ძალიან დაეხმარებოდა საქართველოს საგარეო ასპარეზზე ევროკავშირში დაჩქარებული გაწევრიანების საკითხს. მივდივართ ჩვენ, ოპოზიციის წარმომადგენლები – ხათუნა სამნიძე, თამარ კეკენაძე და მე. გვექნება შეხვედრა ევროპარლამენტარებთან, ასევე იქნება “ალდეს” სამიტი, სადაც ვოლოდიმერ ზელენსკის პარტია გაწევრიანდება “ალდეს” ოჯახში, რომლის წევრიც გახლავთ “სტრატეგია აღმაშენებელი”, “რესპუბლიკური პარტია” და “თავისუფალი დემოკრატები”.
ჩვენ ვიმსჯელებთ ორ საკითხზე: პირველი ეს არის მშვიდობა და უსაფრთხოება საქართველოში, თუ რა ნაბიჯები უნდა გადაიდგას რუსული აგრესიის შესაკავებლად და მეორე რა უნდა მოიმოქმედოს ჩვენმა ქვეყანამ, რომ მივიღოთ დაჩქარებული წესით ევროკავშირის კანდიდატის სტატუსი.
ჩვენს ევროპელ კოლეგებს ასევე მივმართავთ თხოვნით, რომ მხედველობაში არ მიიღონ “ქართული ოცნების” უმსგავსო განცხადებები, რადგან საქართველო იმსახურებს გახდეს ევროკავშირის წევრი ქვეყანა”, – აცხადებს გიორგი ვაშაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
