რა არის რეალური საბაბი იმის, რომ რუსეთის ფედერაცია ტექსტში არ არის მოხსენიებული?! – ამ კითხვით პარლამენტის პლენარულ სხდომაზე უკრაინასთან დაკავშირებით, მმართველი პარტიის მიერ შედგენილი რეზოლუციის პროექტის განხილვის მიმდინარეობისას “სტრატეგია აღმაშენებლის” წევრმა თეონა აქუბარდიამ მმართველ პარტიას მიმართა.
აქუბარდიამ საგარეო ურთიერთობათა კომიტეტის თავმჯდომარის პირველ მოადგილეს გიორგი ხელაშვილს მიმართა და მმართველი პარტიის წარმომადგენელს განუმარტა, რომ ამ ქმედებით არა მხოლოდ მისამართი ეშლება, არამედ მცდარ პოზიციებს და შეხედულებებს უზიარებდა სხდომის მაყურებლებს.
“ბატონო გიორგი, თქვენ დაიწყეთ გამოსვლა ძველი რეზოლუციებით, ასევე ისტორიით, რომელიც მე შეგახსენეთ და გთხოვეთ, რომ არ განმეორებულიყო პარლამენტში, რადგან ეს არ იყო ქვეყნის ინტერესი. ისტორია არის ის რეზოლუცია, რომელიც “ ქართული ოცნების” ინიცირებით იყო პარლამენტში მიღებული, “ნაციონალურ მოძრაობას” არ ჰქონდა მასზე ხმა მიცემული.
ჩემთვის გაუგებარია, თქვენ რატომ გვესაუბრებით კოლექტიური სახელით ოპოზიციას იმიტომ, რომ ამ პარლამენტში 9 პოლიტიკური პარტიაა და არ არის მხოლოდ “ნაციონალური მოძრაობა”.
გთხოვთ, იქნებ დაიმახსოვროთ, რომ ჩვენ აქ ვართ სხვა პარტიების წარმომადგენლებიც და გვაქვს მრავალი განსხვავებული პოზიცია, როდესაც მე მეუბნებით, რომ “ნაციონალური მოძრაობამ” ხმა არ მისცა ამ რეზოლუციას და ჩემი მომართვა იყო ამ კონკრეტულზე ვფიქრობ, რომ არა მხოლოდ მისამართი გეშლებათ, არამედ მცდარ პოზიციებს და შეხედულებებს უზიარებთ ჩვენს მაყურებელს, რომლებსაც თქვენ ატყუებთ და ამბობთ, რომ ყველა ერთ პოზიციაზე იმყოფება.
მიუხედავად იმისა, რომ თქვენ ცდილობთ ისევ და ისევ პარტიულ რიტორიკაში გადაიტანოთ ეს ყველაფერი, კიდევ ერთხელ გიფიქსირებთ, რომ მე ამას არ მივიღებ, რადგან მე არ ვარ “ნაციონალური მოძრაობის” წარმომადგენელი, არასოდეს არ ვყოფილვარ, არც მომავალში არ ვაპირებ და თქვენგან ამ შენიშვნას მე პირადად არ მივიღებ. ახლა, რაც შეეხება მიზეზს და არა საბაბს, რის გამოც ამ რეზოლუციაში ოპოზიციის მხრიდან მხარდაჭერა არ იქნება და არამხოლოდ “ნაციონალური მოძრაობისგან” – კიდევ ერთხელ ხაზგასმით ავღნიშნავ.
როდესაც საუბრობთ მიზეზზე და არა საბაბზე, დიახ საბაბია, როდესაც რუსეთის ფედერაციას არ წერთ იმიტომ, რომ “ნაციონალურმა მოძრაობამ” თქვა ასე და ამ შემთხვევაში დეოკუპაციის რეზოლუციას, რომელიც თქვენ ახლა ახსენეთ მხარდაჭერა აქვს მათ შორის ჩვენი პოლიტიკური ჯგუფის ისევე, როგორც “ლელოს” პოლიტიკური ფრაქციის.
ამიტომ გთხოვთ, რომ გავმიჯნოთ და მითხარით – რა არის რეალური საბაბი იმის, რომ რუსეთის ფედერაცია ტექსტში არ არის მოხსენიებული?!” – კითხულობს თეონა აქუბარდია.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
