“რაიმე ოფიციალური დოკუმენტი, რითიც პატიმარ სააკაშვილს აცნობებენ, რომ გადაჰყავთ მე-18 დაწესებულებაში, – ასეთი რამ არ არსებობს” – ნინო ლომჯარია

გლდანის მე-18 ბრალდებულთა და მსჯავრდებულთა სამკურნალო დაწესებულებაში გადაყვანილი მიხეილ სააკაშვილი სახალხო დამცველმა, ნინო ლომჯარიამ მოინახულა და მათი საუბრის დეტალების თაობაზე მედიასთან კომენტარი გააკეთა:

“ვისაუბრეთ, მოვლენებს ის აღწერს შემდეგნაირად. როგორც განაცხადა, მას უთხრეს რომ შედგა კონსილიუმი და მან იცოდა კონსილიუმის გადაწყვეტილებით უნდა გადაეყვანათ მულტიფუნქციურ სამოქალაქო კლინიკაში. შესაბამისად, საკუთარი ნებით დათანხმდა გადაყვანას. თუმცა, ჩვენ მე-12 დაწესებულებაშიც ვიყავით და იქ რაიმე ოფიციალური დოკუმენტი, რითიც პატიმარ სააკაშვილს აცნობებენ, რომ გადაჰყავთ მე-18 დაწესებულებაში, – ასეთი რამ არ არსებობს. ამასთან დაკავშირებით ის ამბობს, რომ ზეპირად მან იცოდა სამოქალაქო კლინიკაში გადაყვანის თაობაზე.

მას შემდეგ, რაც ის შემოიყვანეს გლდანის ციხის ტერიტორიაზე, როგორც თქვა, მას არ სურდა გადმოსვლა სასწრაფო-სამედიცინო დახმარების მანქანიდან. მისი თქმით, ის ძალის გამოყენებით შეიყვანეს დაწესებულებაში.

მას ჩემთვის არ დაუდასტურებია, რომ აქვს დაზიანებები, თუმცა ექიმს იგი არ გაუსინჯავს. დაზიანებებთან დაკავშირებით არ საუბრობს და არც ვიზუალურად ეტყობა, თუმცა სჯობს, რომ ექიმმა დაათვალიეროს და ამის თაობაზე შედგეს ოქმი“, – განაცხადა ნინო ლომჯარიამ.