თბილისში გამოჩენილ ე.წ. სისხლიან ბანერებთან მიმართებაში გამოთქმულ მწვავე შეფასებებს, იმ კონტექსტში, რომ ეს ბანერები გადააკრეს ვაქცინაციის მოწოდების შინაარსის მქონე ბანერებზე, ეხმიანება დაავადებათა კონტროლის ცენტრის დირექტორი ამირან გამყრელიძე. ქვეყნის მთავარი ეპიდემიოლოგი ადასტურებს რომ ბანერების განთავსების კონტრაქტორ მხარეს წარმოადგენს, თუმცა მისთვის ცნობილი არ იყო თუ რა მიზეზით მოხდა ბანერების შეცვლა და მოუწოდებს გარე სარეკლამო ბაზრის კომპანია „ალმა“-ს ვაქცინაციის მხარდამჭერი შინაარსის შემცველი ბანერების დაუყოვნებლივ აღდგენა:
“როდესაც, ყოველდღიურად, სამწუხაროდ ათასობით ადამიანი ავადდება, ათეულობით კი იღუპება, ამ ვერაგი დაავადებით და ამავდროულად, ბოლო დღეების განმავლობაში, კოვიდ-19-ის საწინააღმდეგო ვაქცინაციის პროცესს კლებადი ტენდენცია აქვს, საკმაოდ ნეგატიური შედეგი ექნება ვაქცინაციის მხარდამჭერი ბანერის ნებისმიერი სხვა შინაარის მქონე ბანერით ჩანაცვლებას.
ამასთანავე, ჩვენ შორის არსებული სახელშეკრულებო პრაქტიკის მიხედვითაც ბანერების განთავსების ლოკაციის ცვლილებაც შესაძლებელია მხარეთა მხოლოდ წინასწარი შეთანხმებით. რაც, ამ კონკრეტულ შემთხვევაში, არ მომხდარა. ბანერების შეცვლის თაობაზე ინფორმაციის წინასწარ ქონის შემთხვევაში, ეროვნული ცენტრი ყველა შესაძლო საშუალებას გამოიყენებდა, რათა უპირობოდ გაგრძელებულიყო ბანერების განთავსების ყველა საჭირო ღონისძიება და მომხდარიყო ვაქცინაციის პოპულარიზაცია მოსახლეობის სიცოცხლის გადასარჩენად.
მოგიწოდებთ, გარე ბილბორდებზე უზრუნველყოთ კოვიდ-19-ის საწინააღმდეგო ვაქცინაციის მხარდამჭერი შინაარსის შემცველი ბანერების დაუყოვნებლივ აღდგენა, ვინაიდან პანდემიის პერიოდში სწორედ იმუნიზაცია არის პანდემიის დასრულების რეალური საშუალება.
ამ შინაარსის წერილი დღეს ოფიციალურად გაეგზავნა კომპანია “ალმას” და მე ძალიან დიდი იმედი მაქვს, რომ ისინი გაითავისებენ იმ დიდ სოციალურ პასუხისმგებლობას, რაც დღეს თითოეულ კომპანიას, თითოეულ ადამიანს აქვს, ჩვენს ქვეყანაში“, – განაცხადა ამირან გამყრელიძემ.
