დღეს საკანონმდებლო ორგანოში ფრაქციებმა: „შარლ მიშელის რეფორმების ჯგუფი“ და „ლელო პარტნიორობა საქართველოსთვის“ 19-21 ივნისის დაზარალებულთა საკითხზე კანონპროექტი დაარეგისტრირეს. როგორც ფრაქციებში აცხადებენ, ორფრაქციულ დოკუმენტში მნიშვნელობა ენიჭება დაზარალებულთა კომპენსირებისა და მათი ჯანმრთელობის დაზღვევის საკითხებს:
„დღეს ვარეგისტრირებთ ძალიან მნიშვნელოვან კანონს, 20 ივნისს დაზარალებულთა კომპენსაციის შესახებ. ეს კანონი გახლავთ ორფრაქციული კერძოდ კი, ფრაქციების – „შარლ მიშელის რეფორმების ჯგუფის“ და „ლელო პარტნიორობა საქართველოსთვის“ მიერ შემუშავებული. აღნიშნული კანონპროექტი ითვალისწინებს:
1. აბსოლუტურად ყველა დაზარალებულის ერთჯერად კომპენსაციას;
2. საპენსიო უზრუნველყოფას იმ დაზარალებულების, რომლებმაც ფიზიკური დაზიანება მიიღეს;
3. სამედიცინო ხარჯების სრული ანაზღაურება სიცოცხლის ბოლომდე.
ეს არის ის ჰუმანური აქტი, რომელიც ყველამ ერთად უნდა მივიღოთ. ამ საკითხთან დაკავშირებით ჩვენ საუბარი გვქონდა ყველა ფრაქციასთან თუ პოლიტიკურ ჯგუფთან, ვინც პარლამენტშია. დღეის მონაცემებით შემიძლია ვთქვა, რომ ოპოზიციური ფრაქციები და პოლიტიკური ჯგუფები გვეთანხმებიან ამ ინიციატივაში და სავარაუდოდ, რა თქმა უნდა, მხარს დაუჭერენ ამ ინიციატივას. რაც შეეხება „ქართულ ოცნებას“, მათგან ამ ეტაპზე პასუხი არ გვაქვს. იმედი მაქვს, რომ „ქართული ოცნება“ ახლა მაინც, ამ ჰუმანურ აქტთან დაკავშირებით, თავის ვიწროპარტიულ ინტერესებს გადადებს გვერდზე და იმაზე მაინც შევთანხმდებით, რომ როდესაც ამდენი ადამიანი დაზარალდა, მათზე ზრუნვა არის ჩვენი საერთო სახელმწიფოებრივი და საერთო ეროვნული ვალდებულება“, – განაცხადა გიორგი ვაშაძემ.