“სტრატეგია აღმაშენებლის” სოციალური მიმართულების ხელმძღვანელი, ნინოწმინდის ბავშვთა პანსიონის საკითხს ეხმაურება. თეონა ჭალიძის თქმით აღნიშნულ პანსიონში არსებული ბავშვების ბედით სახელმწიფო არ ინტერესდება და მოითხოვს, რომ საკითხზე რეაგირება ყველა შესაბამისმა უწყებამ მოახდინოს:
“ნინოწმინდის ბავშვთა პანსიონში სახალხო დამცველის რწმუნებულებს მონიტორინგის განხორციელების შესაძლებლობა კვლავ არ მიეცათ. მიუხედავად იმისა, რომ გაეროს ბავშვის უფლებათა კომიტეტმა 7 მაისს გამოსცა დროებითი ღონისძიება, რითაც სახელმწიფოს დაავალა – დაუყოვნებლივ უზრუნველყონ პანსიონში ბავშვის უფლებრივი მდგომარეობის შემოწმება.
პანსიონში განთავსებულია 56 ბავშვი, როგორც ჩანს მათი ბედი სახელმწიფოს არ აღელვებს. არათუ არ აღელვებს, არამედ ხელს უწყობს და ფარავს თავისი უმოქმედობითა და გულგრილობით პანსიონში არსებულ სავარაუდო დარღვევის ფაქტებს.
ვიზიარებ სახალხო დამცველის მოწოდებას ყველა შესაბამისმა სახელმწიფო უწყებამ დაუყოვნებლივ მოახდინოს რეაგირება. ასევე გადაიხედოს ნინოწმინდის ბავშვთა პანსიონისთვის სააღმზრდელო საქმიანობის ლიცენზირების შეწყვეტის საკითხი” – აცხადებს თეონა ჭალიძე.
