ბოლო 3 თვის ბიუჯეტის მონაცემებს პარლამენტში მიმდინარე კვირაში განიხილავენ. ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, მიხეილ სარჯველაძე კომენტარს აკეთებს. მისი თქმით, ბიუჯეტის მონაცემების განხილვა პანდემიით გამოწვეული შედეგებისა და შექმნილი ეკონომიკური პრობლემების ფონზე განსაკუთრებით მნიშვნელოვანია:
“პროცედურულად გათვალისწინებულია კვარტალური შესრულების ანგარიშის წარდგენა საქართველოს პარლამენტისათვის. ეს ძალიან მნიშვნელოვანია, მით უმეტეს, იმ ფონზე, როდესაც საუბარი გვაქვს კოვიდპანდემიით გამოწვეულ შედეგებზე. მათ შორის, იმ დარტყმებზე, რომლებსაც ეკონომიკა განიცდის – ეს ურთულესი პრობლემებია, არა მხოლოდ საქართველოსთვისა და ამ რეგიონისათვის, არამედ მთელი მსოფლიოს მასშტაბით არსებობს ეს პრობლემა.
ბუნებრივია, რაკი გამონაკლისი არც ჩვენი ქვეყანაა, საუბედუროდ, შესაბამისად, ეს განსაკუთრებულ ყურადღებას საჭიროებს. ეს ჩვეულებრივ შემთხვევაშიც მნიშვნელოვანი საკითხია და ახლა, რა თქმა უნდა, ერთიორად გაზრდილია ამ საკითხების განხილვის მნიშვნელობა“, – აცხადებს მიხეილ სარჯველაძე.
