“დღეს, კიდევ ერთხელ, ჩვენი დასავლელი პარტნიორების მოწოდების შესაბამისად, კიდევ ერთ ნაბიჯს ვდგამთ შეთანხმებისთვის, 25-ის აქციას გადავდებთ და იმედი გვაქვს, ამას დაინახავს „ქართული ოცნებაც“, – განაცხადა გიორგი ვაშაძემ ოპოზიციური პარტიებისა და არასამთავრობო სექტორის ერთობლივი გადაწყვეტილების გახმოვანებისას.
ოპოზიციონერ ლიდერი მოუწოდებს ხელისუფლებას მოლაპარაკებების დაწყებისკენ, რომ ქვეყანაში დროულად მოხდეს უმძიმესი კრიზისის განმუხტვა:
“ვფიქრობ, რომ ძალიან მნიშვნელოვანია სწორი გადაწყვეტილება მივიღოთ ყველამ. ხელისუფლებას და “ქართულ ოცნებას” მივმართავ, ახლაც, რომ მათ აქვთ ორი არჩევანი – ან დაპირისპირება, კონფრონტაცია ან მოლაპარაკებები და შეთანხმება. ჩვენ პირველივე დღიდან ვაცხადებთ, რომ მზად ვართ მოლაპარაკება/შეთანხმებისთვის და მზად ვართ, რომ დაუყოვნებლივ დაიწყოს მოლაპარაკებები ამ უმძიმესი კრიზისის განმუხტვისთვის. სამწუხაროდ, ჯერჯერობით “ქართული ოცნების” მხრიდან ვხედავთ მხოლოდ და მხოლოდ კონფრონტაციას და მეტს არაფერს. მაგრამ დღეს, კიდევ ერთხელ, ჩვენი დასავლელი პარტნიორების მოწოდების შესაბამისად, კიდევ ერთ ნაბიჯს ვდგამთ შეთანხმებისთვის, 25-ის აქციას გადავდებთ და იმედი გვაქვს, რომ ამას დაინახავს მეორე მხარეც.
ქვეყანა ასაშენებელია, საჭიროა სახელმწიფოებრივი მიდგომები და არა ვიწროპარტიული ინტერესების გატარება! ხელისუფლებაზე ჩაბღაუჭება არავის არასოდეს გამოსვლია და არც “ქართულ ოცნებას” გამოუვა. ამიტომ, ჩვენ ძალიან მარტივ რამეს ვითხოვთ – ერთხელ და სამუდამოდ ქვეყანაში დასრულდეს პოლიტიკური ანგარიშსწორება, სრულად შეიცვალოს საარჩევნო სისტემა, გატარდეს რეფორმები და რაც მთავარია დაინიშნოს რიგგარეშე საპარლამენტო არჩევნები, რომ ეს უმძიმესი პოლიტიკური კრიზისი განიმუხტოს, რომელიც უკვე თვეების მანძილზე გრძელდება ქვეყანაში,” – განაცხადა გიორგი ვაშაძემ.