მთავრობის პირველი ვიცე-პრემიერის, მაია ცქიტიშვილის განცხადებას – “ალბათ შევთანხმდებით, რომ სკოლები ამ ეტაპზე უფრო მნიშვნელოვანია ვიდრე ბაღები. ბაღების ჯერიც დადგება”, – ეხმიანება “სტრატეგია აღმაშენებლის” პოლიტსაბჭოს წევრი, სოციალური მიმართულების ხელმძღვანელი თეონა ჭალიძე და აღნიშნავს, რომ ბევრი რამის გათვალისწინებით, ძალზე მნიშვნელოვანია საბავშვო ბაღების ფუნქციონირების აღდგენა:
“ვერ შევთანხმდებით ქ-ნო მაია! რაიმე კვლევით ან სტატისტიკით არის გამყარებული თქვენი ეს განცხადება? თუ კი, გაგვაცანით. თუ არადა, ბაღში ბავშვების სიარული რომ ძალიან მნიშვნელოვანია, არამარტო მათი სოციალიზაციისთვის, არამედ ფიზიკური განვითარებისთვისაც, ალბათ იცით.
ბევრი ბავშვი ბაღში უკეთ იკვებება, ვიდრე სახლში. ბაღების მიერ დარიგებული პროდუქტის რაციონი არაა თანხვედრაში იმასთან, რაც დამტკიცებულია. იშვიათი გამონაკლისების გარდა არ რიგდება ხორცპროდუქტები, თევზი, ხილი, ბაღის ბავშვების მშობლებისთვის. იმაზე აღარაფერს ვამბობ რომ, რაც რიგდება იმის ნაწილი საკვებად უვარგისია.
ამას ემატება ისიც, რომ დასაქმებული მშობლები, ძირითადად ქალები, იძულებულები არიან მიატოვონ სამსახური, რადგან ბავშვის დამტოვებელი არ ჰყავთ. ალბათ ისიც მოგეხსენებათ რომ ბაღის ასაკის ბავშვს მარტო ვერ დატოვებ.
ჰოდა ამ ყველაფრის გათვალისწინებით რა ლოგიკით განსაზღვრეთ პრიორიტეტები? უბრალოდ აგვიხსენით მაინც,” – წერს ფეისბუქის პირად გვერდზე თეონა ჭალიძე.
