სალომე ზურაბიშვილი: “ნეტავ მქონდეს მეც ჩემი ჭორვილა!”

58

საქართველოს პრეზიდენტი, ივანიშვილის ოჯახის ჭორვილაში ცხოვრებასთან დაკავშირებით, ნინო ბურჯანაძის მოსაზრებას ეხმიანება და მიაჩნია, რომ ეს ჩვენი სოფლად მცხოვრები მოქალაქეების და ყველა იმ ადამიანის შეურაცხყოფაა, რომლებზეც დიდწილად დგას ჩვენი აწმყო და მომავალი:

ჭორვილა თუ არა ჭორვილა!

პოლიტიკური სფეროს სხვადასხვა “ლიდერების” განცხადებებზე კომენტარების გაკეთება არ მჩვევია, თუმცა ამ შემთხვევაში, არა თუ დასაშვებად, არამედ აუცილებლადაც კი მიმაჩნია პასუხის გაცემა ისეთ შეურაცხმყოფელ განცხადებაზე, როგორიც ცოტა ხნის წინ გაკეთდა.

თურმე “ფსიქიკურად” შეშლილი უნდა იყო, რომ ჭორვილაში 15 წელი იცხოვრო. ეს შეურაცხყოფაა, არა კონკრეტული ადამიანისა, როგორც ამ პიროვნებას ჰგონია, არამედ ზოგადად, ჩვენი სოფლად მცხოვრები მოქალაქეებისა. შეურაცხყოფაა იმ ადამიანებისა, რომლებზეც დიდწილად დგას ჩვენი აწმყო და მომავალი.

სწორედ სოფლად მცხოვრებლებმა მოგვიტანეს ბოლო პერიოდის ყველაზე დიდი წარმატებები: მეღვინეობის ტრადიციების აღდგენა, ტურიზმი.

სამაგიეროდ, ვიცით თუ რა მოუტანა საქართველოს ახლო წარსულში სოფლისა და მთის დაცლამ. ვიცით ჩვენი წინაპრები, როგორ დიდ მნიშვნელობას ანიჭებდნენ სოფელს და ადგილობრივ წეს-ჩვეულებებს, ჩვენი იდენტობისა და თვითმყოფადობის შესანარჩუნებლად. ვინც ამას ვერ აფასებს, ის საქართველოს ნიჭსა და ძალასაც ვერარას გაუგებს.

მე პირადად, საკუთარი გამოცდილებიდან გამომდინარე, შემიძლია ვთქვა, თუ რა დიდი ტკივილი და დანაკლისია, როცა კომუნიზმმა და ემიგრაციამ ჩამოგაშორა სოფელს და მამულს.
ნეტავ მქონდეს მეც ჩემი ჭორვილა!” – წერს სალომე ზურაბიშვილი ფეისბუქის პირად გვერდზე.

 

ინფორმაციისთვის: გუშინ ტვ “პირველის” ეთერში “ერთიანი საქართველო – დემოკრატიული მოძრაობის” ლიდერმა ნინო ბურჯანაძემ შემდეგი რამ განაცხადა:

მოსახლეობას კითხვა არ უნდა გაჩენოდა – ეს კაცი, მილიარდები რომ აქვს, ჭორვილაში რატომ ზის 15 წელიო?

თქვენ ნორმალური ფსიქიკის ადამიანი გგონიათ, ვინც თავისი ნებით, თუ რამე არ უჭირს, 15 წელი ოჯახს ჭორვილაში აცხოვრებს?

კომენტარები