შვილმოკლული მამის უდიდესი ტკივილით აღსავსე პოსტი სოციალურ ქსელში, სადაც იგი იხსენებს ყველა იმ ფაქტს, რამაც მისი ოჯახის ცხოვრება რადიკალურად შეცვალა, შეიცვალა ბევრი რამ ქვეყანაშიც, მალხაზ მაჩალიკაშვილი კი დღემდე ეძებს სამართალს:
“25 ნოემბერი – დაბადების დღე; 25 დეკემბერი – მძინარე თემირლანზე თავდასხმა, მისამართარეული სპეცრაზმთა ბრბოსი; დღე 10 იანვარი – მისი აპარატიდან გამორთვა; 14 დღის ტყუილების მერე ეს ყველაფერი იმდენად ახლოსაა ერთმანეთან, ეს მოკლე პერიოდი გონებას მიბინდავს და სულს მიხუთავს…
ზუსტად სამი წლის წინ, ზუსტად ამ დროს, 11 საათზე თემირლანმა დამისვა კითხვა ასეთი, ეხლა მახსენდება – “ადამიანის თვალები ფერებს თუ იცვლისო?” მაშინ თემირლანის კითხვამ, ცოტა არ იყოს, დამაბნია და ვკითხე – რატომ მეკითხები მეთქი. მისი პასუხი, ბოლო მის სიცოცხლეში, არვიცი რატომღაც მე თვალებში ფერები მეცვლება… ამითი დამთავრდა ჩემი და თემირლანის საუბარი ცხადში შემდეგ კი უკვე სიზმრებში გრძელდება ჩვენი გულახდილი საუბრები კითხვა-პასუხები, ამ 3 წლის განმავლობაში.
მხეცი მინახია წვიმიან, ტალახიან ამინდებში დაჭრილი, სასტიკად განადგურებული, კუთხეში მიმწყვდეული გაფართოებული თვალებით და ბევრის მთქმელი მზერით. მან არ იცის რატომ ექცევა კაცობრიობა ასე სასტიკად. ის მხეცია, მას მეტი აზროვნების უნარი არ აქვს და ღმერთმაც მეტი არ უბოძა. განსხვავებით, ჩვენ ადამიანები, ამ ყველაფრით უნარის, აღთქმის, გააზროვნების, მიტევების, მეტყველების და შურისძიების ყველა მაღალი თვისებებით დაგვაჯილდოვა ღირსების და სიკეთესთან მიმავალ გზაზე.
მაგრამ ვერ ვხვდები, – მე რატომ ვარ ეს სამი წელი ასე სასტიკად მოკლული ვაჟის მამა ასეთი კუთხეში მიმწყვდეული?! მე ხომ მხეცისგან განსხვავებით ადამიანი ვარ? როგორ არ გამოჩნდა, ამ ხნის განმავლობაში, ამ ყველაფრის ღმერთისგან ნაბოძები ადამიანი, რომ მომიშუშოს ის ჭრილობები და დამაყენოს იმ გზაზე რომ ყველაფერს წერტილი დავუსვა?
აქვე მინდა ცოტათი განვლილ ჯოჯოხეთურ გზაზე გაგესაუბროთ. საზოგადოებაში გამოჩნდნენ გარკვეული პირები, რომლებიც ვახას შეცდომებზე ალაპარაკდნენ. მე, ამ გაუსაძლის ბრძოლაში, ტკივილთან ერთად, ყველაზე ბინძური სისტემის მანქანას დავეჯახე და შევებრძოლე. ეს თითეული უსამართლოდ დაჩაგრულისთვის გავაკეთე. კი იყო პატარა შეცდომები, მაგრამ უამრავ ჩემთვის დაგებულ ბინძურ ხაფანგს გადავაბიჯე. დარწმუნებული ვარ ჩემს ადგილას ნებისმიერი ასჯერ მეტს შეცდომას დაუშვებდა და ისე დავარდებოდა ძირს, რომ მისი წამოდგომა შეუძლებელი იქნებოდა.
აქვე, ჩემი დღევანდელი მტკივნეული დღის მიუხედავად, მინდა თქვენთვის მნიშნელოვანი დღე შობა მოგილოცოთ მეგობრებო“, – წერს ფეისბუქის პირად გვერდზე მალხაზ მაჩალიკაშვილი.
