საქართველოს ჯანდაცვის სამინისტროსა და თბილისის ინფექციურ საავადმყოფოს შორის შექმნილ გაურკვევლობას ინფექციური საავადმყოფოს სამედიცინო დირექტორი მარინა ეზუგბაია ეხმაურება.
ეზუგბაია აღნიშნავს, რომ დროებით კლინიკა შეწყვეტს აივინფიცირებულთა და კოვიდინფიცირებულთა მიღებას მანამ, სანამ არ შეიქმენა სპეციალური პირობები მოსახლეობისათვის სამედიცინო მომსახურების მაღალი ხარისხით უზრუნველსაყოფად:
“ჩვენ არ ვწყვეტთ პაციენტების მიღებას, ჩვენ დროებით ვაჩერებთ მათ მიღებას. ესენი არიან კოვიდინფიცირებული და აივ/შიდსით ინფიცირებული, სტაციონალური პაციენტები.
ჩვენი მიზანი და პაციენტების მიზანი თანხვედრაშია. ჩვენი მიზანია, რომ ჩვენს ცენტრში მოსახლეობამ მიიღოს მაღალხარისხიანი სამედიცინო მომსახურება.
მაღალხარისხიანი მომსახურების განუყოფელი ნაწილია სამედიცინო პერსონალის პროფესიონალიზმი, რომელიც არაერთხელ დაგვიმტკიცებია ეპიდემილოგიური მართვის პერიოდში და მაღალპროფესიონალიზმთან ერთად, ხარისხის შენარჩუნებისთვის მნიშვნელოვანია გამართული ინფრასტრუქტურა, ეს არის გადაუდებელი სასიცოცხლო მნიშვნელობის საჭიროება და არა ფუფუნება,” – განაცხადა თბილისის ინფექციური საავადმყოფოს სამედიცინო დირექტორმა, მარინა ეზუგბაიამ.
ავტორი
მახო ზავრაშვილი
