დღეს საქართველოს პრემიერ-მინისტრმა პარლამენტს წლიური ანგარიში წარუდგინა. გიორგი გახარიამ აღნიშნა, რომ ქვეყნის უმთავრეს გამოწვევად კვლავ რუსული ოკუპაცია რჩება. მთავრობის მეთაურის თქმით, „ქართულ ოცნებას“ კარგად აქვს გააზრებული მათი პასუხისმგებლობა ოკუპირებულ ტერიტორიაზე მცხოვრები თითოეული მოქალაქის ჯანმრთელობაზე, სიცოცხლეზე და თავისუფლად გადაადგილების უფლებაზე. პრემიერმა ასევე, ისაუბრა და ხაზი გაუსვა სახელმწიფო სერვისსა და მომსახურეობის ხელმისაწვდომობის მნიშვნელობას:
„დღეს საქართველოს ფუნდამენტურ გამოწვევას წარმოადგენს ოკუპაცია. რუსული ოკუპაცია კვლავაც რჩება ეროვნული უსაფრთხოების უმთავრეს გამოწვევად და როდესაც ვსაუბრობთ ჩვენი ქვეყნის ოკუპირებულ 20%-ზე, ყველას კარგად უნდა გვესმოდეს, რომ ესაა ის შეზღუდვა, რომელიც რეალური ფაქტორია ქვეყნის შემდგომი განვითარებისთვის. ეს არაა მხოლოდ და მხოლოდ ჩვენი ქვეყნის ტერიტორიის ან მიწის 20%-ის შეზღუდვა. ეს ყველა სფეროს შეზღუდვაა. პირველ რიგში კი ეს შეზღუდვა გულისხმობს ადამიანური რესურსების შეზღუდვას. ჩვენი ეკონომიკაა შეზღუდული კიდევ უფრო მეტად. ეს არის უკიდურესად მნიშვნელოვანი, რომ გავიაზროთ ყველამ ერთად.
აქ ყველას ერთად უნდა გვესმოდეს, რომ რუსეთის ფედერაცია, როგორც ადგილზე ეფექტური კონტროლის განმახორციელებელი სახელმწიფო, დღეს უაღრესად, პასუხს აგებს ყველა იმ ადამიანის ფუნდამენტური უფლებების დარღვევაზე, რომელიც ხდება ოკუპირებულ ტერიტორიებზე. დაწყებული ადამიანის გატაცებით, სიცოცხლისა და ჯანმრთელობის ხელყოფით გაგრძელებული ბორდერიზაციით. ჩვენ, ყველას კარგად გვესმის, რომ ეფექტური კონტროლის განმახორციელებელი ქვეყანა, რა თქმა უნდა, ყველა ამ ნაბიჯზე არის პასუხისმგებელი.
გარდა ამისა, ჩვენ, ყველას კარგად უნდა გვესმოდეს, რომ ცხინვალის რეგიონი, ისევე როგორც აფხაზეთი, ოკუპაციის ტერიტორიის იქითა მხარეში მცხოვრები ადამიანები არიან ჩვენი მოქალაქეები. ყველა ის სახელმწიფო სერვისი და მომსახურება, რომელსაც ვაწვდით ჩვენს მოქალაქეებს, ყველაფერი უნდა გავაკეთოთ, რათა ხელმისაწვდომი იყოს თითოეული მოქალაქისთვის,“ – აღნიშნა გიორგი გახარიამ.
