ბატონო პრემიერო, არც ჯანდაცვის სამინისტრო ზრუნავს ადამიანებზე და არც თქვენ ზრუნავთ ხალხზე – თეონა ჭალიძე

3537

პრემიერ-მინისტრ გიორგი გახარიას განცხადებას, რომ ხელისუფლება ზრუნავს თითოეულ ადამიანზე, ეხმიანება ,,ახალი საქართველოს“ სოციალური მიმართულების ხელმძღვანელი თეონა ჭალიძე. პარტიის პოლიტსაბჭოს წევრი მთავრობის მეთაურს კონკრეტულ ფაქტებზე მიუთითებს და პასუხს მოითხოვს უკიდურესად გაჭირვებული ადამიანების გაუსაძლისი ყოფის გამო:

ჯანდაცვის სამინისტროს საქმიანობის შეჯამებისას გახარიამ დღეს უტიფრად განაცხადა: – ,,ჩვენ მივაღწიეთ იმას, რომ მივედით თითოეულ ადამიანამდე და მას ვაგრძნობინეთ სახელმწიფოს მხრიდან ზრუნვა მის ჯანმრთელობაზე, მის სიცოცხლზე, მის სოციალურ მდგომარეობაზე, მის შრომით უზრუნველყოფაზე, სამუშაო ადგილებზე და კიდევ ბევრ რამეზე და ამას ყველაფერს ჯანდაცვის სამინისტრო უზრუნველყოფს“.

ამას რომ აცხადებთ, ბატონო პრემიერო და თავს იწონებთ, რამხელა ცინიზმია. რომელ თითოეულ ადამიანამდე მიხვედით?! ათასობით ადამიანი რომ შიმშილობს ახლა და ამ წუთებში, ათასობით ადამიანი რომ უწამლოდ იტანჯება და ბევრი ადამიანი იმიტომ კვდება, რომ სამედიცინო პროცედურებისთვის თანხა არ აქვს – ესაა ადამიანებზე ზრუნვა?!

დიახ, თქვენ კარგად აგრძნობინეთ ადამიანებს, რომ ამ სახელმწიფოში ადამიანი არ არის ღირებული, მის სიცოცხლეს ფასი არ აქვს და ყველაზე დიდ გასაჭირში მიატოვეთ ადამიანები. ესაა რეალობა და ეს იგრძნო ბევრმა ადამიანმა საკუთარ თავზე. თუ თითოეულ ადამიანზე იზრუნეთ, აბა ისინი ვინ არიან, ვინც ვერც პროდუქტი მიიღო სახელმწიფოსგან, ვერც კომუნალური შეღავათით ისარგებლა, ვერც თქვენს ანტიკრიზისულ გეგმაში მოხვდა?! ვინ არიან ეს ბავშვები თუ უფროსები, ესენი არ არიან ადამიანები?!

პანდემიის დროს საარსებო შემწეობის გარეშე რომ დატოვეთ ოჯახები და ჯანდაცვის სამინისტროს და სოციალური მომსახურების სააგენტოს ცხელი ხაზებიც რომ ,,გამორთეთ“ ეგაა ადამიანებზე ზრუნვა?!

პროდუქტზე ფასები რომ გაიზარდა, ათასობით ადამიანი რომ უმუშევარი დარჩა, ქირას რომ ვეღარ იხდიან ოჯახები, ბანკები რომ ახრჩობენ ხალხს და თქვენ რომ ,,იმიტირებული დახმარებებით“ იწონებთ თავს და ხელს არ ანძრევთ ეგაა ზრუნვა?!

ასე რომ, ბატონო პრემიერო, არც ჯანდაცვის სამინისტრო ზრუნავს ადამიანებზე და არც თქვენ ზრუნავთ ხალხზე…” – აცხადებს თეონა ჭალიძე.

კომენტარები