საქართველოს პრემიერ-მინისტრი გიორგი გახარია აცხადებს, რომ მთავრობა გარდა სიცოცხლის/ჯანმრთელობისა და ეკონომიკური ფრონტებისა, ახლა უკვე იბრძვის პოლიტიკურ ფრონტზე, რომელიც გუშინ პოლიტიკური მასკარადის სახით გამოჩნდა და ამ ბრძოლაშიც წარმატებულები და გამარჯვებულები იქნებიან:
„გუშინ აღმოვაჩინეთ, რომ გაგვეხსნა ახალი ფრონტი, პოლიტიკური ფრონტი, რაღაც პოლიტიკური მასკარადის სახით, რომელმაც რისკის ქვეშ დააყენა და შეიძლება დააყენოს ადამიანების ჯანმრთელობა და სიცოცხლე.
ერთმნიშვნელოვნად მინდა, რომ ყველამ იცოდეს, – რა თქმა უნდა, ყველა ეტაპზე მთავრობისთვის პრიორიტეტი ადამიანის ჯანმრთელობა და სიცოცხლე იქნება და ვერავინ ვერ შეუშლის ხელს იმ შეზღუდვების გაგრძელებას, რომელიც საჭიროა იმისთვის, რომ მთავრობამ და ხელისუფლებამ პირველ რიგში ადამიანის ჯანმრთელობაზე იზრუნოს.
ამიტომ ჩვენ ვაცხადებთ, რომ ქვეყანა მზად არის დღეს გადადგას ნაბიჯი და გააუქმოს საგანგებო მდგომარეობა, რაც პარალელურად ნიშნავს, რომ კომენდანტის საათიც გაუქმდება, ამას მოჰყვება გარკვეული შემსუბუქებებიც, ჩვენ ასევე ვიმსჯელეთ და მაგალითად ერთ ავტომობილში მხოლოდ სამი ადამიანის შეზღუდვა გაგრძელდება მხოლოდ ტაქსებისთვის და სხვა ყველა ავტომობილისთვის ეს შეზღუდვა გაუქმდება.
თუ აქამდე ვიბრძოდით ორ ფრონტზე ჯანმრთელობის, ეკონომიკური განვითარების, ახლა დაგვემატა ახალი და ამასაც უნდა გავუძლოთ და ამ ფრონტზეც უნდა ვიყოთ წარმატებულები და გამარჯვებულები,“ – განაცხადა გიორგი გახარიამ.
გუშინ პარლამენტმა მიიღო კანონპროექტი „საზოგადოებრივი ჯანმრთელობის დაცვის შესახებ“, რაც გულისხმობს, რომ 15 ივლისამდე მთავრობას ქვეყანაში შემზღუდავი ღონისძიებების გატარება საგანგებო მდგომარეობის გამოცხადების გარეშეც შეეძლება. აღნიშნულ კანონპროექტს მხარი 80-მა დეპუტატმა დაუჭირა, მოწინაღმდეგე 3 ჰყავდა.
ავტორი
თამთა ასლანიშვილი
