საკორდინაციო საბჭოს სხდომის შემდეგ გამართულ ბრიფინგზე, ვიცე პრემიერის, რეგიონული განვითარებისა და ინფრასტრუქტურის მინისტრის მაია ცქიტიშვილის განცხადებით, 9 ნოემბრიდან საქართველოს დიდ ქალაქებში 22:00 საათიდან დილის 05:00 საათამდე გადაადგილება შეზღუდული იქნება. ამ წერტილოვანი შეზღუდვის შესახებ გადაწყვეტილება საკორდინაციო საბჭომ დღეს მიიღო:

„ვხედავთ, რომ წინა კვირებთან განსხვავებით ძალიან სწრაფია ვირუსის გავრცელების დინამიკა და თუ ამ კვირის დასაწყისში ჩვენ გვქონდა 1900-ზე ოდნავ მეტი შემთხვევა, დღეის მდგომარეობით უკვე აღემატება 2800 შემთხვევას. შესაბამისად, ჩვენ მიერ, დღეს იქნა მიღებული გადაწყვეტილება დამატებითი წერტილოვანი შეზღუდვების შემოღების თაობაზე, კერძოდ ორშაბათიდან, 9 ნოემბრიდან, საქართველოს დიდ ქალაქებში: თბილისში, ქუთაისში, ბათუმში, რუსთავში, ზუგდიდში, გორში და ფოთში 22:00 საათიდან დილის 05:00 საათამდე იქნება შეზღუდული გადაადგილება, ეს შეზღუდვა გავრცელდება, როგორც ქვეითად მოსიარულეებზე, ასევე ტრანსპორტითა და კერძო ავტომობილებით მოსიარულეებზეც.

ეს შეზღუდვა არ გავრცელდება, რა თქმა უნდა, საერთაშორისო საავტომობილო გადაზიდვებზე და საოპერაციო შტაბთან შეთანხმებით იმ პირებზე და მათ საავტომობილო საშუალებებზე, რომლებიც გადაადგილდებიან სტრატეგიული მნიშვნელობის ობიექტების ფუნქციონირებისთვის, ასევე სამედიცინო, ფარმაცევტული დაწესებულებებისთვის, მედია დაწესებულებების ფუნქციონირებისთვისა და რა თქმა უნდა მიტანის სერვისისს უზრუნველსაყოფად.

ამავე ქალაქებში ორშაბათიდან იქნება შეჩერებული როგორც კერძო ასევე მუნიციპალური საბავშვო ბაღების ფუნქციონირება და იგივე ქალაქებში, მუნიციპალიტეტებთან უკვე აქტიურად ვმუშაობთ, იმისთვის რომ მათ მიერ იქნას შემოტანილი გარკვეული ღონისძიებები, რათა უშუალოდ მუნიციპალურ ტრანსპორტში შეიზღუდოს მგზავრთა რაოდენობა, თუმცა აქვე მინდა აღვნიშნო, რომ ეს არ ნიშნავს იმას რომ დღის საათებში მუნიციპალური ტრანსპორტის რაოდენობა ან გადაადგილება იქნება შეზღუდული. ჩვენ  ვსაუბრობთ მხოლოდ ტრანსპორტით გადაადგილებისას ადამიანების ნაკლებ რაოდენობაზე“, – განაცხადა მაია ცქიტიშვილმა.

ავტორი
ნუცა ჯოხაძე

საკოორდინაციო საბჭოს სხდომის შემდეგ მთავრობის ადმინისტრაციაში ბრიფინგი გამართა დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა ამირან გამყრელიძემ და ყურადღება გაამახვილა სტომატოლოგებისა და პენსიონრების ჩართულობაზე კორონავირუსთან ბრძოლაში, რადგანაც საჭიროა ადამიანური რესურსი კოვიდინფიცირებულთა ადამიანების მოსავლელად:

‘‘სამწუხაროდ, ისევ და ისევ, ერთ დონეზე რჩება ჩემი კოლეგების, სამედიცინო პერსონალის დაინფიცირების მაჩვენებელი და ეს ძალიან კრიტიკულია – 183 შემთხვევა იყო 24 საათის განმავლობაში, რაც ცუდია იმ თვალსაზრისით, რომ ისინი ფრონტის წინა ხაზე არიან, ეს ადამიანური რესურსი კი საჭიროა კოვიდინფიცირებულთა ადამიანების მოსავლელად.

ჩვენს კოლეგებს, ვინც დღეს დასაქმებულები არ არიან ან პენსიაზე არიან, მათ შეიძლება მოეძებნოთ საქმე. გასაგებია, რომ ასაკოვან ექიმებს ვერ გამოვიყენებთ რეანიმაციებსა და ჰოსპიტალებში, მაგრამ ისინი კოვიდცენტრებში, პირველადი ჯანდაცვის დაწესებულებებში, კოვიდსასტუმროებში შეიძლება დასაქმდნენ.

საჭიროა ასევე სტომატოლოგების მობილიზება, რომლებიც ბევრნი არიან ქვეყანაში და აქვთ შესაბამისი სამედიცინო განათლება, მათ ნასწავლი აქვთ შესაბამისი საგნები სამედიცინო ინსტიტუტში, რის შედეგადაც კარგად იციან ადამიანის ჯანმრთელობის შესახებ.

მე-5, მე-6 კურსის სტუდენტები, რომელთაც ძირითადი კლინიკური საგნები გავლილი აქვთ, თავისუფლად შეიძლება ექიმის, ექთნის ასისტენტებად იმუშავონ ამ პერიოდში, რადგან ამ ტიპის მოძრაობა ქვეყანაში საჭიროა, იმიტომ რომ ჩვენ შევდივართ ეპიდემიური სიტუაციის გარკვეულ ზღვარზე, რომელიც სამართავია’’, – განაცხადა ამირან გამყრელიძემ.

ავტორი
ანა რობაქიძე

საკორდინაციო საბჭოს სხდომაზე, ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა მიმდინარე მოვლენებზე ისაუბრა და განაცხადა თუ რა დამატებითი ღონისძიებების დაწესებაა შესაძლებელი კორონავირუსის გავრცელების თავიდან ასაცილებლად:

„ახალი მონაცემებით, ისევე როგორც მთელი მსოფლიო, ჩვენც შევდივართ ახალ ფაზაში. დღეს დაფიქსირდა 2400 შემთხვევა. გასაგებია, რომ პოლიტიკური პროცესი ჩვენს ქვეყანაში ძალიან აქტიურად მიმდინარეობს, თუმცა ხშირ შემთხვევაში ჩვენ ვხედავთ, რომ ეს პროცესები ყოველგვარი წესების დაცვის გარეშე მიმდინარეობს და ბუნებრივია ეს ყველაფერი პირდაპირ აისახება ინფიცირებულთა რაოდენობის ზრდაზე.

თუ პოლიტიკური პროცესის ყველა მონაწილემ არ გაიაზრა, რომ მათ პასუხისმგებლობა აქვთ ამ პროცესში და არ დაიწყო ყველა წესის შესრულება, ეს მოგვიტანს ინფიცირებულთა რაოდენობის მკვეთრ ზრდას.

ჩვენთვის აუცილებელია, რომ მოხდეს, მთელი საზოგადოების კონსოლიდაცია, ყველა ჩვენგანის ამოცანაა, რომ დავიცვათ ჩვენი ჯანდაცვის სისტემა, თანამოქალაქეები და ეკონომიკა. ეს ძალიან მარტივია, ჩვენ უნდა დავიცვათ ყველა ის წესი, რომელიც არის დადგენილი და აპრობირებული მთელ მსოფლიოში.

მე შეგახსენებთ, რომ დღეისთვის პირბადის ტარება არის სავალდებულო, როგორც დახურულ სივრცეში ასევე ღია სივრცეებშიც. ასევე ქვეყნის მასშტაბით ყველა რესტორანი და საკვები ობიექტი მუშაობს 22 საათამდე. კვლავ იკრძალება ხალხმრავალი სოციალური აქტივობებისა და ღონისძიებების გამართვა.

რა თქმა უნდა საკორდინაციო საბჭო მსჯელობს იმაზე, თუ რა დამატებითი ღონისძიებები და რა წერტილოვანი შეზღუდვების დაწესება არის შესაძლებელი, რათა გავუმკლავდეთ და შევამციროთ ვირუსის გავრცელება. ეს შეიძლება იყოს სხვადასხვა სახის ღონისძიებები, როგორიც არის საღამოსა და ღამის საათებში გადაადგილების შეზღუდვა. ასევე, შეიძლება უქმე დღეებში, ან კვირის რომელიმე ერთ დღეს, ან სხვადასხვა დასახლებებში როგორც ტრანსპორტის, ისე სხვადასხვა ტიპის სავაჭრო ცენტრის ან სხვადასხვა სახის დიდი გადაადგილების, ბაზრობების ან ბაზრების მუშაობის შეჩერება.

ყველა არის წერტილოვანი ხასიათის ღონისძიება, რომელიც იქნება გამოყენებული იქ და იმ დროს, რომლის აუცილებლობაც იქნება ეპიდემიოლოგიური ვითარებიდან გამომდინარე“ – განაცხადა მაია ცქიტიშვილმა.

ავტორი
ნუცა ჯოხაძე