საქართველის პარლამენტართა საზოგადოების თავმჯდომარე, მანანა ჯებაშვილი, სოციალურ ქსელში, საფრთხისშემცველი ინფორმაციის ციტირებას ახდენს და მასზე დაყრდნობით მძიმე პოლიტიკურ შეფასებებს აკეთებს:
“ეს არის ჩვენი ახლო მომავლის პერსპექტივა. ამისთვის ხდება ასე გაშმაგებით პროტესტის ჩახშობა და დევნა. ყველა უნდა დასაჯონ, ვისაც მეამბოხე სული აქვს და ვინც სამშობლოს დაკარგვის პერსპექტივას ეწინააღმდეგება (დანარჩენი ისედაც ცხვრის ფარასავით მიყვება პროცესს)‼️
ამ ბოლო დროს არსებული პოლიტიკური რეალობიდან გამომდინარე ველოდი, რა იქნებოდა რუსეთიდან გადადგმული შემდეგი ნაბიჯი საქართველოსთან მიმართებით და ვვარაუდობდი, რომ ეს საკითხი უნდა დამდგარიყო დღის წესრიგში‼️
ეს პერსპექტივა ცხადად გამოიკვეთა შარშან, საპარლამენტო არჩევნებამდე, როდესაც ბიძინა ივანიშვილმა განაცხადა (ზეპირად გამოთქვა რუსეთიდან მიღებული ინსტრუქციის ტექსტი) – ჩვენ უნდა ვაღიაროთ, მოვინანიოთ და ბოდიში მოვუხადოთ ჩვენ აფხაზ და ოს დებს და ძმებს, რომლებიც ცეცხლის ალში გავხვიეთო (ისე, თავმოყვარე ერი ამ სიტყვებისთვის პასუხს მოსთხოვდა მამა-მარჩენალს, მაგრამ ჩვენ გავატარებთ (მცირე პროტესტებს და წინააღმდეგობებს არ ვგულისხმობ), ამას მასობრივი მღელვარება არ მოყოლია.
ამ განცხადებიდან 1-2 თვის შემდეგ ჟენევის ფორმატით შეხვედრის დროს რუსეთის საგარეო საქმეთა მინისტრის მოადგილემ დასვა საკითხი, რომ ძალიან კარგია საქართველოს მიერ ამის აღიარება, მაგრამ ეს ახლა საქმეში უნდა გადაითარგმნოს და მოხდეს საზღვრების დემარკაცია დელიმიტაციაო‼️
ასეთი მარტივია ყველაფერი‼️
ამის გასაკეთებლად კი საჭიროა საქართველოში იყოს სრული ტერორი და დიქტატურა, რასაც დიდი მონდომებით, სასტიკად და დაუნდობლად ახორციელებს ეს ხელისუფლება ყველა მეთოდის გამოყენებით (4 ოქტომბერის ამბავშიც მათი ხელი ერია, თუმცა არაფერი გამოუვიდათ, ყველა ყველაფერს მიხვდა)‼️“, – აცხადებს მანანა ჯებაშვილი.
და კონკრეტული ინფორმაციის ციტირებას ახდენს:
ვლადიმერ პუტინმა დსთ-ს წევრ მეზობელ ქვეყნებთან რუსეთის სახელმწიფო საზღვრების დელიმიტაციისა და დემარკაციის საკითხებში ახალი სპეციალური წარმომადგენელი დანიშნა, – ინფორმაციას რუსული მედია ქვეყნის პრეზიდენტის, ვლადიმერ პუტინის განკარგულებაზე დაყრდნობით ავრცელებს.
„რუსეთის ფედერაციის საგარეო საქმეთა სამინისტროს საგანგებო დავალებათა ელჩი ნიკოლაი უდოვიჩენკო დაინიშნოს რუსეთის ფედერაციის პრეზიდენტის სპეციალურ წარმომადგენლად რუსეთის ფედერაციის სახელმწიფო საზღვრის დელიმიტაციისა და დემარკაციის საკითხებში მეზობელ ქვეყნებთან – დამოუკიდებელი სახელმწიფოების თანამეგობრობის წევრებთან.
ასევე, მას აფხაზეთის რესპუბლიკასთან, საქართველოსთან და სამხრეთ ოსეთის რესპუბლიკასთან რუსეთის ფედერაციის სახელმწიფო საზღვრის დელიმიტაციისა და დემარკაციის მოვალეობა დაეკისროს“, – ნათქვამია განკარგულებაში.
ამასთან, პუტინის განკარგულების მიხედვით, ნიკოლაი უდოვიჩენკო „კასპიის ზღვის შესახებ მოლაპარაკებებში რუსეთის დელეგაციას უხელმძღვანელებს“.
ნიკოლაი უდოვიჩენკომ აღნიშნულ თანამდებობაზე მიხაელ პეტრიაკოვი შეცვალა.
