“ლეიბორისტული პარტიის” თავმჯდომარე შალვა ნათელაშვილი, კორონავირუსის გავრცელების გამო ქვეყანაში შექმნილი მდგომარეობიდან გამომდინარე, ხელისუფლებას მოუწოდებს სტუდენტებს სწავლის საფასური გაუუქმოს:
“დღეს, როდესაც ვირუსული პანდემიის გამო, მთელ მსოფლიოში, პარალიზებული და შეჩერებულია საგადასახადო-საბანკო სისტემათა ფუნქციონირება, მილიარდობით ადამიანი განთავისუფლებულია შენატანის, გადასახადის და სხვა ანგარიშსწორებებისგან, საქართველოს მთავრობა დაბეჯითებით სთხოვს სტუდენტებს სწავლის გადასახადს და გადასახადის გადაუხდელობის შემთხვევაში ემუქრება უმაღლესი სასწავლებლიდან გარიცხვით, რათა ამ სისტემიდან 53 ათას გაძევებულ ახალგაზრდას კიდევ დაემატოს ათასობით ათასი.
მოვითხოვ, საქართველოს მთავრობისაგან, სასწრაფოდ მიღებული იქნას გადაწყვეტილება და ყველა სტუდენტი, მიმდინარე წელს, საერთოდ განთავისუფლდეს სწავლის გადასახადისგან. შეწყვიტეთ, ჩვენი შვილების ხარჯზე, ბიუჯეტის შევსება, ჯიპების ყიდვა, პრემიების გაცემა და მილიარდიანი ბიზნესების დატრიალება,” – განაცხადა შალვა ნათელაშვილმა.
