“ივანიშვილმა გაანადგურა ქუთაისი და იმერეთი, თუმცა არჩევნებში გამარჯვების შემდგომ მიხეილ სააკაშვილი, “ერთიანობა – ნაციონალური მოძრაობა” გპირდებით, რომ აუცილებლად გაგრძელდება ქუთაისის, იმერეთის აღმშენებლობა, შეწყდება გელათის ნგრევა, პოლიტიკური ცენტრი კვლავ დაბრუნდება ქუთაისში და ქუთაისი თავისი განვითარების ტემპით გახდება ერთ-ერთი პირველი ქალაქი,”- განაცხადა “ერთიანობა – ნაციონალური მოძრაობის” გენერალური მდივნის მოადგილემ, ირაკლი ფავლენიშვილმა ქუთაისთან დაკავშირებით არსებულ რეალობაზე საუბრისას.
მისი თქმით, მოქმედი ხელისუფლების პირობებში იმერეთში დაგროვდა პრობლემები, რაც ხელისუფლების შეცვლისთანავე გამოსწორდება:
“2012 წლამდე, მიხეილ სააკაშვილის და “ერთიანი ნაციონალური მოძრაობის” მმართველობის დროს ქუთაისში რეაბილიტირდა ბაგრატი, აშენდა აეროპორტი, ქუთაისმა შეიძინა პოლიტიკური ცენტრის ფუნქცია, აქ უნდა გადმოსულიყო სამთავრობო შენობები და გადმოვიდა პარლამენტი, მაგრამ 2012 წლის შემდგომ ყველა ეს პროექტი ფაქტობრივად იქნა განადგურებული ივანიშვილის რეჟიმის მიერ, თუმცა “ერთიანობა – ნაციონალური მოძრაობა” და მიხეილ სააკაშვილი გპირდებათ, რომ არჩევნებში გამარჯვების შემდგომ შეწყდება გელათის ნგრევა, შეწყდება ქუთაისის, იმერეთის დაჩაგვრა.
სწორედაც რომ ივანიშვილის მოღალატეობრივი პოლიტიკის შედეგია, რომ ქუთაისი ათი ათასობით ადამიანმა დატოვა, ქუთაისი დატოვა ყველა ინვესტორმა, სწორედაც რომ მათი ბრალია, რომ იმერეთი დატოვა უპრეცედენტო ადამიანების რაოდენობამ – ასი ათასზე მეტმა ადამიანმა. დიახ, ქუთაისი და იმერეთი არის განწირული სიკვდილისთვის ივანიშვილის ხელებიდან, მაგრამ ჩვენ, ქართველი ხალხი ქუთაისს და იმერეთს ვპირდებით, რომ აუცილებლად დასრულდება ეს მავნებლური, მოღალატეობრივი პოლიტიკა. ჩვენ აუცილებლად გავაგრძელებთ ქუთაისის აღმშენებლობას, ქუთაისი აუცილებლად გახდება პოლიტიკური ცენტრი, პარლამენტიც დაუბრუნდება თავის ადგილს და ქუთაისი თავისი განვითარების ტემპით გახდება ერთ-ერთი პირველი ქალაქი, ქუთაისში იცხოვრებენ ქუთაისელები და არ დატოვებენ მას”, – განაცხადა ირაკლი ფავლენიშვილმა.
ინფორმაციას “ერთიანობა – ნაციონალური მოძრაობის” პრესსამსახური ავრცელებს
