“შეიძლება მოვიდეს ისეთი დრო, რომ ჩვენი იდენტობა, კულტურა, უბრალოდ უფლება ვიცხოვროთ ისე, როგორც ჩვენ ვთვლით საჭიროდ აი აქ, ამ მიწაზე, ჩვენ შეიძლება ერთად მოგვიწიოს დავიცვათ” – გიორგი გახარია

ყოფილი პრემიერ-მინისტრი, პარტია ,,საქართველოსთვის” თავმჯდომარე, გიორგი გახარია YouTube-ის საკუთარ პლატფორმაზე, გადაცემა ,,გახარიას კვირაში” საუბრობს აფხაზეთში მიმდინარე პოლიტიკურ პროცესებთან დაკავშირებით და კონკრეტულ პარალელს ავლებს ქვეყანაში მიმდინარე მოვლენების ფონზე, როდესაც საპარლამენტო არჩევნებამდე რამდენიმე თვეა დარჩენილი:

• ეს აფხაზური ამბავი, რამე ბმაში არის ჩვენთან ამ არჩევნების წინ?

– ყველაფერი რაც ხდება აფხაზეთში, სინამდვილეში, არის საქართველოსთან პირდაპირ ბმაში. ამ ჩვენი მთავრობის ეს რეაგირება ან არრეაგირება უსუსურობაა ჩვეულებრივი, უმაქნისი ხელისუფლება რომ გეყოლება.

• ეშინიათ, ვერ ჩაერევიან იქ, ალბათ. მათ ჩვენთან აქვთ დიდი გული.

– ეშინიათ არა… მე ვფიქრობ, რომ არ ესმით, უბრალოდ ვერ ხვდებიან. რაც იქ ხდება, მე წავიკითხე ბევრი, მათ შორის, რუსულ რესურსებზეც და მინდა გითხრათ, რომ მე ვამაყობ იმით, რასაც სამოქალაქო საზოგადოება ახლა აფხაზეთში აკეთებს. ფორმები შეიძლება სხვადასხვა იყოს, მაგრამ ეს ხალხი დაირაზმა და ის კი არ თქვა, რომ ,,აი, იცით რა, გაგრაში თუ უძრავი ქონება გაიყიდება ქვეყნის ბიუჯეტში უფრო მეტი ფული შემოვა და ჩვენ ცოტა უკეთესად ვიცხოვრებთ”, თქვა, რომ ,,ჩვენს პატარა ქვეყანაში, თუ კარებს გავუხსნით ათასჯერ უფრო დიდ რუსულ კაპიტალს, მისი კონტროლის შემდგომ არანაირი რესურსი არ გვექნება და მთავრობავ, აგვიხსენი საერთოდ რას აპირებ და რა ხდებაო”, – მხოლოდ და მხოლოდ ეს თქვა. არ უთქვამს, რომ ,,არ გვინდა რუსეთი”, ,,არ გვინდა ეკონომიკის ზრდა”.

სამოქალაქო საზოგადოება იქ [აფხაზეთში], ხალხი იქცევა ძალიან ღირსეულად. ღმერთმა ქნას, რომ არ დაგვჭირდეს, მაგრამ შეიძლება მოვიდეს ისეთი დრო, რომ ჩვენი იდენტობა, კულტურა, უბრალოდ უფლება ვიცხოვროთ ისე, როგორც ჩვენ ვთვლით საჭიროდ აი აქ, ამ მიწაზე, ჩვენ შეიძლება ერთად მოგვიწიოს დავიცვათ. ვის გამო გვიწევს ერთად დავიცვათ, ეს ყველასთვის ცნობილია.

ავტორი
ნინი ხიჯაკაძე