პარლამენტის ვიცე-სპიკერი, ნინო წილოსანი, სოციალურ ქსელში ტიკტოკის პლატფორმაზე, ვიდეოკასტის მეშვეობით ახალგაზრდებს მიმართავს და ცდილობს აუხსნას, თუ რა დეფინიციის მატარებელია ე.წ. ,,ნაცობა”:
,,გამარჯობა, ამ ვიდეოკასტს ვწერ განსაკუთრებით იმ ახალგაზრდებისთვის, რომლებიც კომენტარებში იქნება თუ სხვა სივრცეებში ამბობენ, რომ ,,ჩვენ ნაცები არ ვართ! ჩვენ უბრალოდ კანონს ვაპროტესტებთ!”
მინდა აგიხსნათ, რომ ნაცობა კი არ ნიშნავს, რომ ,,ნაციონალური მოძრაობის” პარტიის წევრი ხართ ან არ ხართ. ,,ნაცობა” მიმართულებაა, კონკრეტული დიაგნოზია. ,,ნაცობა” ნიშნავს იმას, რომ შენი ინტერესის გულისთვის შეგიძლია, რომ ქვეყნის საწინააღმდეგო მიმართულებითაც წახვიდე. შეგიძლია, რომ უმტრო შენს ქვეყანას. მაგალითად, იარო კარდაკარ, ოთახ-ოთახ, ევროპულ ინსტიტუციებში, ევროპარლამენტარებთან და სთხოვო, რომ ასოცირების შეთანხმება არ გაგიფორმონ, ვიზალიბერალიზაცია არ მოგცენ, კანდიდატის სტატუსი არ მოგცენ. ისე, როგორც იქცეოდნენ თქვენ აქციაზე მდგომი პოლიტიკური ლიდერები.
,,ნაცობა” იმას ნიშნავს, რომ ინტერვიუ ინტერვიუზე აძლიო, სხვადასხვა საერთაშორისო პლატფორმა გამოიყენო და ილაპარაკო, რომ საქართველოს არ ეკუთვნის კანდიდატის სტატუსი. იცით, ვინ ამბობდა ამას? – სალომე ზურაბიშვილი, რომლის სასახლის წინ გაზეიმეს 26 მაისი. სწორედ ეს ადამიანი მტრობდა საქართველოს. სწორედ ეს არის ,,ნაცობა”.
,,ნაცობა” არის, როდესაც შეგიძლია შვილები საკუთარ მშობელს გადაამტერო. შეგიძლია მოუწოდო, რომ შვილები წინ აღუდგნენ, გადაუდგნენ და გადაემტერონ თავის მშობელს. სრულებით მორალისგან დაცლილი ადამიანის გარდა, რა შინაარსის მქონე ადამიანს შეეძლო ესეთი მოწოდებები ეკეთებინა. ან ოჯახში არ გაზრდილხართ, ან რელიგია არ გაქვთ, ან მორალი არ გაქვთ, ან ეთიკა არ გაქვთ ან ამ ქართულ სოციუმში არ იზრდებით?!
,,ნაცობა” იმას ნიშნავს, რომ მზად ხარ ფსიქოლოგიური ტერორი მოუწყო შენი პირადი მიზნებისთვის, მზად ხარ ადამიანს დააბრალო ისეთი რამ, რომელიც იმ ადამიანს ყველაზე “Horror” სიზმარშიც კი არ დაესიზმრება – დააბრალო რუსობა, შენს საკუთარ ქვეყანაში დაჩექინდე დილით და თქვა, რომ რუსეთში ხარ…”, – აცხადებს ნინო წილოსანი.
ავტორი
ნინი ხიჯაკაძე
