საზოგადოებაში გავრცელებულ მოსაზრებას, რომ შესაძლებელია აფხაზეთისა და ცხინვალის რეგიონის საქართველოსთვის დაბრუნების საკითხის განხილვა დაიწყოს, პირდაპირი შეკითხვებით და კონკრეტული მინიშნებებით ეხმაურება ანალიტიკოსი გოჩა მირცხულავა:
“აფხაზეთისა და ე.წ. სამხრეთ ოსეთის თემით სპეკულირება, ოცნების მორიგი ტრიუკია. ჯერ ახსნან “ვინ აბრუნებს?”, “აფხაზები გვიბრუნდებიან?”, “რა პირობით?”, კონფედერაციის არსი განუმარტონ ამ იდეით ასაგდებ ქაჯებს და რისკები, ეკონომიკური ტვირთი.
რამდენი დევნილია მზად დაბრუნდეს სახლში, დაბრუნებულები აბარებენ მათთვის ჩვენი ფულით (გადასახადის გადამხდელების) გადაცემულ სახლებს “აქ”? რა ინვესტიციის ჩადებას გეგმავს თბილისი აფხაზეთის აღსადგენად და საიდან ეს ფული? ჯარი, ფული, საგარეო კურსი – ემთხვევა ჩვენი და მათი ინტერესები? მილიონი სხვა კითხვაა, რომელზედაც პასუხი თავად აფხაზებს არ აქვთ და ერთი წამით არ დაიჯეროთ, რომ სოხუმი გააკეთებს იმას, რასაც ეტყვის მოსკოვი.
ყველაზე მთავარი – რუსეთის იმპერიას ნებით არავისთვის აუხსნია უღელი და არ დაუბრუნებია ტერიტორიები.
ასე რომ ბიძინამ და მისმა ხელისუფლებამ ეს “ქართული ოცნება” მორიგ საარჩევნო აფიორად აირჩია და იმედს ვიტოვებ, ამ იდიოტობას არავინ განიხილავს რეალობად“, – წერს ფეისბუქის პირად გვერდზე გოჩა მირცხულავა.
