„გუშინ ჩვენ ვიხილეთ „რუსული სამთავრობო მარში“, სადაც ადამიანები ძალდატანებით, მოტყუებით და მოსყიდვით ჰყავდათ ჩამოყვანილი საქართველოს რეგიონებიდან და სადაც ჩაწერილი ტაშის ფონზე ბიძინა ივანიშვილს დაცარიელებულ რუსთაველზე უწევდა სიტყვით გამოსვლა“, – განაცხადა პლენარულ სხდომაზე ფრაქცია „ერთიანი ნაციონალური მოძრაობა“ – გაერთიანებული ოპოზიცია „ძალა ერთობაშიას“ თავმჯდომარე თინათინ ბოკუჩავამ.
მისი თქმით, „ქართულმა ოცნებამ“ იმ ხალხის ნდობა, ვინც შესაძლოა 2012 წელს მათ მხარი დაუჭირა, დაკარგა იმიტომ, რომ ხელისუფლებამ უკვე ღიად გადაუხვია ქვეყნის ევროპულ კურსს.
„თქვენ ცდილობთ ჩვენს ქვეყანას წაართვათ ევროპული მომავალი. ჩვენ ვხედავთ, რომ საქართველოს ყოველწლიურად ტოვებენ საქართველოს მოქალაქეები იმიტომ, რომ შეუძლებელია გაღარიბებულ ქვეყანაში ცხოვრება, სადაც არ არსებობს პერსპექტივა, არ არსებობს სამუშაო ადგილები და ერთადერთი შანსი არის საჯარო სექტორში მუშაობა, სადაც ძალდატანებით, ადამიანებს ტაშის დამკვრელებად ამუშავებთ. მაგრამ, ამაზეც უარი თქვეს ამ ადამიანებმა იმიტომ, რომ ძალიან კარგად ესმით, რომ თქვენ ცდილობთ ჩვენს ქვეყანას ნათელი მომავალი წაართვათ“, – განაცხადა თინათინ ბოკუჩავამ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
