გუშინ, 5 იანვარს, ორბელიანის მოედანზე ტელეკომპანია ,,რუსთავი 2″-ის გადაცემის ,,Prime House • პრაიმ ჰაუსის” წამყვანს, გიორგი ნაზღაიძესა და მის ორ მეგობარს თავს დაესხნენ. სამართალდამცველებმა დაზარებულები უკვე დაკითხეს და საქმის გამოძიება მიმდინარეობს.
აღნიშნულ ფაქტთან დაკავშირებით სოციალური ქსელში გუშინვე ემოციური პოსტი გამოაქვეყნა ტელეწამყვანმა, გიორგი ნაზღაიძემ და მომხდარის კონკრეტულ დეტალებზე გაამახვილა ყურადღება:
,,დღეს საღამოს, რამდენიმე საათის წინ, ჩემს ორ მეგობართან ერთად წარმოუდგენელი ამბავი გადამხდა. ორბელიანის მოედნის ავტოსადგომზე დაახლოებით 30 ადამიანი თავს დაგვესხა, თავი ასეთ საფრთხეში არასოდეს მიგრძვნია, არანაირმა დალაპარაკებამ არ გაჭრა.
ერთ-ერთმა თავდამსხმელმა სცადა, ჩემთვის დანა 2-ჯერ დაერტყა, რომელიც სასწაულებრივად ავიცილე. იძულებული გავხდით ამ დაჯგუფებას გავცილებოდით და თავი გადაგვერჩინა – გავიქეცით, ისინი მოგვსდევდნენ და ქუჩის სკამებს გვესროდნენ. ხალხს ვთხოვდით დახმარებას და არავინ არ დაგვეხმარა, მხოლოდ ერთმა გოგონამ გაგვიჩერა ავტომობილი და მას დაუზიანეს მანქანა, დაუჭრეს საბურავები.
ახლაც ვერ მოვდივარ გონს მომხდარის გამო, მართლა სასწაულებრივად გადავრჩით. ქალაქის ცენტრში 30 შეიარაღებული მოზარდის პირისპირ მარტო აღმოვჩნდით მე და ჩემი ორი მეგობარი, რომელთაგან ერთი მძიმე ფსიქოლოგიური მდგომარეობის ქვეშაა.
ამ ადამიანებისგან და მსგავსი შემთხვევებისგან არავინ არის დაცული. ამიტომ დროულად უნდა მოხდეს დამნაშავეების გამოვლენა და პასუხი უნდა აგონ აუცილებლად! მადლობა ამ უცნობ გოგონას და იმ ტაქსის მძღოლს, რომელმაც შუაგზაზე გაგვიჩერა ავტომობილი და ფაქტიურად, ჩვენი სიცოცხლე გადაარჩინა!“, – წერს გიორგი ნაზღაიძე.
ავტორი
ნინი ხიჯაკაძე
