ბოლო პერიოდში რამდენიმე კანონის მიღებას კონკრეტული შეფასება-განმარტებებით ეხმაურება ჟურნალისტი ვახო სანაია:
“ივანიშვილი ყველა კანონს იღებს, რაც ავტორიტარიზმის განსამტკიცებლად სჭირდება. ცდილობს, ეს ყველაფერი კანდიდატის სტატუსის საკითხის გადაწყვეტამდე მოასწროს.
თუ ქვეყანა სტატუსს მიიღებს, ყველა ეს კანონი შერჩება. ,,სტატუს ვსო სპიშეტ”. იტყვის, აჰა, სტატუსი მივიღეთ, ესე იგი, სულაც არ მოგვიღია ცუდი კანონები, თორემ ხომ არ მოგვცემდნენ სტატუსსო.
თუ სტატუსს ვერ მივიღებთ, მაინც გააგრძელებს მსგავსი კანონების მიღებას და არა მხოლოდ კანონების. სრულად მოხსნილი პასუხისმგებლობით, ისევ ისე გააგრძელებს ავტორიტარიზმის განმტკიცებას – ისევ მძიმე ფორმებითა და ისევ სწრაფი ტემპებით.
მას შემდეგ, რაც მარტში რუსული კანონი ყელზე დაადგა და ვერ გადაყლაპა, ეს დიდი ლუკმა დაანაწევრა და ახლა ნაწილ-ნაწილ შეექცევა. ამ გზით, ერთი მხრივ, დიდ პროტესტს ირიდებს თავიდან, მეორე მხრივ, დასახულ მიზანს ცოტა დროში გაჭიანურებულად, მაგრამ მაინც მიაღწევს – რა თქმა უნდა, თუ გაუვიდა ბოლომდე. თუ შევაჯამებთ ამ შემოვლით გზებს, შეგვიძლია, საკითხებს თავი მოვუყაროთ და ჯამში მივიღებთ აკინძულ რუსულ კანონს.
რა არის გამოსავალი – ოპოზიცია და საზოგადოებაც უნდა აგროვებდეს პროტესტს და შეძლოს საჭირო პროცესში გარდასახვა“, – წერს ფეისბუქის პირად გვერდზე ვახო სანაია.
