„გამარჯვების პლატფორმის“ ფარგლებში, „ნაციონალური მოძრაობის“ და „სტრატეგია აღმაშენებლის“ წარმომადგენლებმა, სკოლების ყოფილ დირექტორებთან და მოსწავლეების მშობლებთან ერთად განათლების სამინისტროსთან აქცია-პერფორმანსი გამართეს. მათ ადგილზე საპროტესტო პლაკატები და აგურები მიიტანეს.
როგორც „სტრატეგია აღმაშენებლის“ პოლიტიკური საბჭოს წევრმა, ნანა ტოხვაძემ აღნიშნა, „ქართულმა ოცნებამ“ საყრდენი გამოაცალა განათლების სისტემას, სკოლების დირექტორები მათთვის მხოლოდ საარჩევნო რესურსია:
„ქართული ოცნების“ პირობებში სასკოლო განათლება ღრმა კრიზისშია და ეს კრიზისი მრავალკომპონენტიანია – ინფრასტრუქტურა, განათლების ხარისი და დემოკრატიული მართვის კულტურა პრაქტიკულად ჩამოშლილია. ბავშვები სკოლის შენობის გარეშე, სკოლები უდირექტოროდ, ხოლო მშობლები კი უპასუხოდ რჩებიან თუ როდის მოხდება, რომ სკოლა, დირექტორები და მასწავლებლები მხოლოდ საარჩევნოდ ხმის მომტან რესურსად არ განიხილოს სახელმწიფომ და მათი პირველადი ფუნქიები დაუბრუნოს ამ ადამიანებს?!
განათლების მინისტრს სიმბოლურად აგურები მივართვით. იქნებ შევახსენოთ, რომ სკოლები ასაშენებელია და მათი დიდი დამსახურებით, უკვე წლებია სკოლების მთავარი საყრდენი, დირექტორები სისტემიდან გამოცლილი. დაანონსებიდან 3 წლის დაგვიანებით წელს დირექტორთა სასერტიფიკაციო გამოცდები ჩატარდა. პოლიტიკური ლოიალობის ტესტისა და სუს-ის კონტროლით 165 მაღალქულიანი კანდიდატი გასაუბრების ეტაპზე ჩაჭრეს. დღეს გვაქვს ვითარება, როდესაც 2074 სკოლიდან 1692 სკოლა ისევ რჩება კვალიფიციური საგანმანათლებლო ლიდერის გარეშე და გამოდის, რომ “არჩევნები” სკოლების 81.6%-ში არ ჩატარდება. დირექტორების “ასარჩევად” კონკურენცია მხოლოდ 18,4% სკოლებში გვაქვს და აქაც არჩევნები გაურკვეველი ვადითაა გადადებული.
განათლების სამინისტროს დუმილი და პროცესის გაუმჭვირვალობა აჩენს გონივრულ ეჭვს, რომ სკოლების სუს-ისგან მართვის მავნებლური პრაქტიკა გრძელდება. საჯარო სკოლების მართვის უფლება არა კომპეტენციის, კვალიფიკაციისა და კეთილსინდისიერების კრიტერიუმებით შერჩეულ კანდიდატებს, არამედ სუს-ისგან ნებადართულ „მწვანე შუქის“ მქონე პირებს ჩაბარდებათ – ხელისუფლების სასარგებლოდ საარჩევნო ხმების მობილიზაციის სანაცვლოდ”, – აცხადებს ნანა ტოხვაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” საზოგადოებასთან ურთიერთობის სამსახური ავრცელებს
