ა.წ. 15 აგვისტოს საქართველოს ქალთა დემოკრატიის ქსელის პროექტის (WDNG) ,,მართე მომავალი – პოლიტიკაში ქალთა მიმართ ძალადობის წინააღმდეგ” ფარგლებში შემუშავდა პოლიტიკის სარეკომენდაციო სახის დოკუმენტი ,,ქალთა მიმართ არსებული ძალადობის ნებისმიერი ფორმის პრევენცია, გამოვლენა, მონიტორინგი და აღმოფხვრა პოლიტიკურ პარტიებში“. ასევე, შემუშავდა ხელმოსაწერი დეკლარაცია, რომელიც პოლიტიკის სარეკომენდაციო დოკუმენტთან ერთად გაეგზავნათ მომავალ საპარლამენტო არჩევნებში სავარაუდო მონაწილე დემოკრატიული ფასეულობების მქონე პარტიებს შესასწავლად და პოზიტიური ნაბიჯების გადასადგმელად.
ავტორების განცხადებით (შორენა ლობჟანიძე – მპგ ,,სტრატეგია აღმეშენებელი”, ეკა დარბაიძე – სამოქალაქო განათლების ლექტორთა ასოციაცია, ელიზა ცხვიტარია-სამოქალაქო აქტივისტი ,,ქალთ ლიბერალთა ერთობა”, თეონა ჭალიძე- მპგ ,,სტრატეგია აღმაშენებლი”), მიუხედავად იმისა, რომ ბოლო პერიოდში გადაიდგა მნიშვნელოვანი ნაბიჯები ქალთა პოლიტიკური წარმომადგენლობის ზრდის კუთხით, კერძოდ 2020 წელს ცვლილებები შევიდა საარჩევნო კოდექსში და პოლიტიკური პარტიებისთვის სავალდებულო გახდა გენდერული კვოტირების მექანიზმის დაცვა, საქართველოში ქალთა პოლიტიკაში ჩართულობის მაჩვენებელი კვლავაც დაბალი რჩება.
საზოგადოებაში არსებული გენდერული სტერეოტიპები და გენდერული როლები, შიდა პარტიული დემოკრატიის დეფიციტი, პოლიტიკაში და პარტიებში გენდერული ძალადობა, პრევენციისა და მასთან გამკლავების შესაბამისი მექანიზმების არარსებობა, კიდევ უფრო მეტად აფერხებს და მოწყვლადს ხდის ქალთა ჩართულობას ქვეყნის პოლიტიკურ ცხოვრებაში.
სწორედ ამიტომ, დოკუმენტიც თანდართული დეკლარაციით მიზნად ისახავს პარტიებში ქალთა მიმართ არსებულ ძალადობის ნებისმიერი ფორმის პრევენციას, გამოვლენას, მონიტორინგსა და აღმოფხვრას, რაც ერთ-ერთი უმნიშვნელოვანესი ნაბიჯი იქნება პოლიტიკაში ქალთა მიმართ ძალადობის წინააღმდეგ ბრძოლის მიმართულებით.
