პარტია ,,ქართული ოცნება – დემოკრატიული საქართველოს“ თავმჯდომარე, ირაკლი კობახიძე ჟურნალისტებთან კომენტარს აკეთებს და განმარტავს, თუ რა თქვა რუსეთის პრეზიდენტმა, ვლადიმირ პუტინმა სავიზო რეჟიმის გაუქმებაზე და რა იგულისხმებოდა იმაში, რომ არაერთხელ იყო თხოვნა საქართველოს მხრიდან უვიზო მიმოსვლაზე:
,,რეალურად, პუტინმა თქვა ასეთი რამ, რომ გაუკვირდა პროტესტი იმ ადამიანების მხრიდან, რომლებიც თავად ითხოვდნენ ასეთ ნაბიჯს [სავიზო რეჟიმის გაუქმებას]. პროტესტი ჩვენი მხრიდან არ იყო გამოხატული. როგორც მოგეხსნებათ, ჩვენ აღვნიშნეთ, რომ ჩვენი მოქალაქეებისთვის არის მნიშვნელოვანი ფრენების აღდგენა. ეს იყო ჩვენი პოზიცია.
როდესაც პუტინი საუბრობდა იმაზე, რომ ვინც ითხოვდა თავის დროზე ფრენების აღდგენას, უვიზო რეჟიმს, ის აპროტესტებს ამ ყველაფერს – გულიხმობდა, როგორც ჩანს, ,,ნაცმოძრაობას“. ჩვენ გვახსოვს, რომ თავის დროზე ,,ნაცმოძრაობა“, როცა იყო ხელისუფლებაში, აქტიურად ითხოვდა ფრენების აღდგენას – 2009 წელზე მაქვს საუბარი.
მან თქვა, რომ გაუკვირდა პროტესტი იმათი მხრიდან, ვინც ამას ითხოვდა. ჩვენ არ გაგვიპროტესტებია.
რუსეთ-საქართველოს ომის დასრულებიდან 1 წლის თავზე, სააკაშვილი აქტიურად მუშაობდა იმისათვის, რომ აღდგენილიყო პირდაპირი ფრენები და რუსეთს უვიზო მიმოსვლა დაეწესებინა. უფრო მეტიც, მაშინ სააკაშვილმა რუსეთ-საქართველოს ომიდან მალევე, სავიზო რეჟიმი რუსეთის მოქალაქეებს ცალმხრივად გაუუქმა.
ეს არის სააკაშვილის ხელისუფლების ღია და ფარული მოალაპარაკება, რაც მას ჰქონდა რუსეთ-საქართველოს ომის შემდეგ პუტინის ხელისუფლებასთან“, – განაცხადა ირაკლი კობახიძემ.
ავტორი
ნინი ხიჯაკაძე
