“ბავშვებს არ აურჩევიათ ეს დაავადება და სახელმწიფო ვალდებულია იზრუნოს მათთვის შესაბამისი პირობების შექმნაზე” – თეონა ჭალიძე დიაბეტის მქონე ბავშვების მშობლებს სოლიდარობას უცხადებს

ჯანდაცვის სამინისტროსთან დიაბეტის მქონე ბავშვებისთვის ინსულინის პროგრამის გაუმჯებესების მოთხოვნით საპროტესტო აქცია გაიმართა.

“სტრატეგია აღმაშენებლის” სოციალური მიმართულების ხელმძღვანელი ჯანდაცვის სამინისტროსთან გამართულ საპროტესტო აქციას ეხმიანება. თეონა ჭალიძე დიაბეტის მქონე ბავშვების მშობლებს სოლიდარობას უცხადებს და სამინისტროს უმოქმედობაში ადანაშაულებს

,,დღეს, დიაბეტის მქონე ბავშვების მშობლებმა ჯანდაცვის სამინისტროსთან საპროტესტი აქცია გამართეს. მათი მოთხოვნები სრულიად ლეგიტიმურია. ისინი აპროტესტებენ იმას, რომ ქვეყანაში ინსულინის დეფიციტია. აუცილებლად უნდა გადაიდგას ნაბიჯები იმისთვის, რომ მოხდეს პრევენცია და მსგავსი პრობლემის წინაშე ადამიანები აღარ აღმოჩდნენ. პროგრამაში ჩართულ ბავშვებზე უნდა მოხდეს შესაბამისი ჩხირებისა და ნემსის თავების გაცემა.

ჯანდაცვის სამინისტროს უპასუხიმგებლობის და გულგრილობის შედეგია დღეს არსებული მდგომარეობა. ნუთუ შეიძლება ბავშვების და არამარტო ბავშვების ასეთ სიტუაციაში ჩაგდება? ჯანდაცვის მინისტრმა წარმოიდგინოს თავი ამ ბავშვების მშობლების ადგილზე და იქნებ მიხვდეს რომ ოპერატიულად მოაგვაროს მათი პრობლემა.

ამ ბავშვებს არ აურჩევიათ ეს დაავადება და სახელმწიფო ვალდებულია იზრუნოს მათთვის შესაბამისი პირობების შექმნაზე და იმის ნაცვლად, რომ ამ სასოწარკვეთილ ადამიანებს დაელაპარაკონ, იმედი მისცენ და პრობლემის ოპერატიულად მოგვარებაზე იფიქრონ სამინისტროს წარმომადგენლებმა, მათ ეძიძგილავებიან, სამინისტროს ფოიეში არ უშვებენ და სრულიად სამარცხვინო სიტუაციაში იგდებენ თავს“, – აცხადებს თეონა ჭალიძე.

ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს