ვიცე-პრემიერი, კულტურის, სპორტისა და ახალგაზრდობის მინისტრი თეა წულუკიანი კომენტარს აკეთებს უკრაინის მხარის თხოვნაზე “ბუკ”-ს სისტემის სამხედრო იარაღის მიწოდებასთან დაკავშირებით დაწყებულ პოლემიკაზე. ვიცე-პრემიერის განცხადებით, საქართველო ვერ აღმოუჩენს ომში ჩართულ ერთ-ერთ მხარეს სამხედრო დახმარებას, რადგან არ სურთ, რომ ქვეყანა ომში ჩაერთოს:
,,საქართველოს ხელისუფლება არ დაუშვებს იმას, რომ საქართველოს სახელმწიფო ჩაბმული აღმოჩნდეს სამხედრო დაპირისპირებაში. შესაბამისად, რა თქმა უნდა, ჩვენ ვერ აღმოვუჩენთ სამხედრო ტიპის დახმარებას ერთ-ერთ მხარეს სამხედრო დაპირისპირებისა. მით უმეტეს, რომ როგორც მე ვიცი, საუბარია ისეთი იარაღის გადაცემაზე, რომელიც ჩვენ შევიძინეთ, მაგრამ ეს უბრალოდ დეტალია, ალბათ.
მთავარი არის ძირითადი გენერალური ხაზი და პოზიცია ამ ხელისუფლებისა და ქვეყნის, რომელსაც ჰქვია საქართველო, რომ ჩვენ არ გვსურს ვიყოთ ომში. ჩვენ ძალიან ბევრი ომი გადავიტანეთ. ეს შეიძლება ზოგიერთ მსმენელს, რომელიც შეიძლება ამ წუთში მისმენს, არ ახსოვდეს და მადლობა ღმერთს, რომ არ ახსოვს. იმიტომ, რომ შემდეგ გაჩნდა და იზრდება მას შემდეგ, რაც ომები საქართველოში დამთავრდა, მაგრამ ჩვენ, ხელისუფლებაში ვართ ომის თაობები.
ჩვენ ძალიან კარგად გვახსოვს ეს რამხელა უბედურებაა. ამიტომ ჩვენ ამას უბრალოდ ვერ დავუშვებთ. ეს არის ჩვენი პასუხიმსგებლობა, ჩვენი ქვეყნის მომავლის წინაშე. ამიტომ ამ დანის პირზე, როგორც აქამდე დავდიოდით, იმედი მაქვს, რომ მომავალშიც წარმატებით გავივლით. უკრაინაში ომი მალე დასრულდება და ის დასრულდება უკრაინული სახელმწიფოს და ხალხის გამარჯვებით“, – განაცხადა თეა წულუკიანმა.
