ვიცე-პრემიერი, კულტურის, სპორტისა და ახალგაზრდობის მინისტრი თეა წულუკიანი განცხადებას აკეთებს საქართველოს მე-3 პრეზიდენტთან მიმართებაში. მმართველი გუნდის ერთ-ერთი ლიდერის განმარტებით, სასამართლოს მოსალოდნელი გადაწყვეტილება ყველასთვის უცნობია, თუმცა თუ ,,ნაციონალური მოძრაობა“ შეეცდება დაპირისპირებას, ეს იქნება მიხეილ სააკაშვილის ბედით თამაში:
,,ჩვენ არ ვიცით რას გააკეთებს სასამართლო. ეს იმ ,,ნაციონალური მოძრაობისთვის“, რომელსაც ჩექმის ქვეშ ჰყავდათ სასამართლო ხელისუფლება, რასაკვირველია, მე ვიცი, რომ დაუჯერებელია, მაგრამ ჩვენ, ხელისუფლებამ – მათ შორის მე, არ ვიცით, რას იზამს სასამართლო!
თუ მოხდა ისე, რომ სასამართლომ, მტკიცებულებებზე დაყრდნობით, არ მიიჩნია საკმარისი საფუძველი იმისათვის, რომ სასჯელის აღსრულება გადავადდეს და ,,ნაციონალური მოძრაობა“ მორიგჯერ შეეცდება ტურბულენტობის ორგანიზებას ჩვენ ქვეყანაში, იქნება ეს 29-ში, 30-ში თუ შემდეგ, რა მნიშვნელობა აქვს ამას, რასაკვირველია, ეს ვერ იქნება ვერანაირი შედეგის მომტანი.
ეს იქნება მორიგჯერ, საკუთარი ვითომ გულშემატკივრების მიერ, მიხეილ სააკაშვილის ჯანმრთელობითა, მისი სიცოცხლით და ბედით თამაში. იმიტომ, რომ მათ ჰგონიათ, რაკი სხვა რესურსი არავითარი აღარ აქვთ უნდა ითამაშონ სააკაშვილით, რომ ვინძლო რამე გამოუვიდეთ.
მე კიდევ იმედს ვიტოვებ, რომ მოვა ის დღე, როდესაც სააკაშვილი გაბრაზდება და თვითონ დაუსვამს ამ აღვირახსნილობას ციხიდან წერტილს. ეს ხელმოცარული პოლიტიკოსები არ იქნებიან დაკავებული მისი ბედით თამაშით და დაკავდებიან პარტიის რეორგანიზაციით, აწყობით, მოწყობით…“, – განაცხადა თეა წულუკიანმა.
ავტორი
ნინი ხიჯაკაძე
